Suuk zamannar hem yısıtmak vakıdın çeketmesi insanın yaşamasına kimi diyşilmeklär getirer. Bu üzerä insannar lääzım kimi koorunmak kurallarını baksınar. Nesoy bu kurallar hem nesoy dooru onnarı tutmaa, GRT kanalında Gagauziya hatalı olaylarbakanı ofiţerı Ruslan Mazurenko annattı.
Kış zamanında yangın olayların zedelenmesi evlerdä hem kvartiralarda baalı sık onunnan, ani kullanarak türlü yısıtmak sistemalarını- soba, yısıtmak elektrika tehnnikasını koorunmak kuralları bakılmȇr hem kullanılmȇr. Onuştan önemni getirmää insanın akılarına, ki yangını var nasıl durgutmaa ya heptän başlandırmamaa.
Ruslan Mazurenko Gagauziya hatalı olaylar bakanı ofiţerı: «Ki başlamaa kullanmaa yısıtmak mallarını, en ilk kimi profilaktika işlerini lääzım geçirmää. Deylim, sobayi lääzım gözletmää çatlakları olmasın. Varsaydı- kapamaa onnarı. Sobanın kapusunun önündä maasuz er demirdän lääzım koymaa ki fırından haşlak yakacak ya kömür parçası düşmesin da yangın çeketmesin. Gaz kotölların durumunu da en ilk lääzım maasuz uzman kontrol etsin».
Gagauziya hatalı olaylarbakanı ofiţerı Ruslan Mazurenko urguladı, ani kuralların sırasında ilk erdä durȇr ventiläţiya sistemasının kullanılması.
«Yısıtmak sistemalarını kullanarak pek önemli kalȇr o, ani ventiläţiya sisteması odalarda ii läzım işlesin, kontrol edilsin»,- Ruslan Mazurenko urguladı.
Profilaktika işlerin geçirilmesin beterinä insana yakın bir aftaya gazı durguttular. Bununnan baalı çoyu imää yapmaa deyni türlü elektrika tehnikasınnan diil sade yısınacek, ama imä da yapacek. O üzerä Gagauziya hatalı olaylar bakanı uzmannarı haberlerlär, ki maasuz kuralları mutlaka lääzım baksınar.
«Elektrika provotlarını kontrol etmää lääzım, dayanacek mı onnarı yısıtmak tehnikasının işlemäk kuvedini. Neçin ki kimär sıra olȇr ölä, ani diil hepsi elektrika sisteması yakışȇr kimi yısıtmak tehnikasına. Bununnan baalı var nasıl yangın başlasın»,- Ruslan Mazurenko urguladı .
Uzmannar naasat ederlär insana baksınar hepsi lääzımnı kuralları, dikat olsunar ki türlü kötü olaylar olmasın.