Komratta neetlerlär  erleştirmää   gözletmäk  kameraları    proektä  görä,  ki  belli etmää  yol  kuralların  yannışlıklarını. Laf  gider  milli  trasalar için, angıları  geçerlär    munuţipiyadan   hem yaşayan  punktlarından. İniţiativa doorudulu,  ki yollarda  korumayı üüseltmää  hem da aazaltmaa  yol  razgelmelerini.

Videogözletmeklerin eni  kompleksları   var kolay   avtomat uurunda belli etsinnär   hızlılıın  üüseltmesini,  mobil telefonun kullanmasını   maşınada gidärkänä hem da   korumak  kayışların  kullanmamasını. Kameralar calışacȇklar gecä — gündüz  hem  vereceklär haberleri   sistemaya. Kuvetlär urgulȇȇrlar, ani sistemanın  kullanması diil sade kaaviliştirecek  kontrolü  yol  kuralları bakmasında,  ama olacȇk önemni profilaktika instrumendi da. Kameralar vereceklär kolaylık,ki şoferlar taa açıkgöz  olsunnar  hem yollarda  taa cuvaplı kullansınnar maşınaları, haberlerdi Komradın  primarın baş yardımcısı Viktor Baldji: «Böleliklän   ayırıldı   3  er. Onnar — çıkışta,  Çadıra  dooru Ferapontyevskaya sokaanda,   er neredä  Şevcenko sokaa, parktan biraz taa  yukarı, mezarlaa  etişmediynän. 3-cä  da  neetleniler kasabanın orta  erindä    5  okuldan diil uzak. Orada sık  yol  razgelmeleri olȇrlar».

Yannışlıkların avtomatik  fiksaţiyası yardımcı olȇr effektiv kontrol etmää durumu yollarda  da  iisiltmää   onun uurunu, haberledi   poliţiya bakannıın uzmanı Natalya  Grıu: «Şoferların bakışları kameraların  koymasınnan baalı pay edildilär».

«Bän sayȇrım,ani kameralar  diil lääzım, neçinki onnar  ölä da çok var, sora  herzaman hızlanmaa yada durgunmaa lääzım,da  bu  diil  pek  uygun.»

«Bän kayılım,necinki  yollarda pek  haydȇȇrlar,da sora  avariyalar  olȇrlar. Ama  bölä  bir — iki  ay  taa sınaşınca,ani  orada  kameralar.Yavaş gezeceklär. Hızlılık da  olacȇk taa  küçük, taa aaz  yol  razgelmekleri dä.»

«Diil hepsi yannışlık yapȇrlar, insan korkȇr, diil lääzım kameralar olsunnar.» 

İnsannar  da   kendi  fikirlerinnän paylaştılar yollarda  kameraların erleştirilmesi için.Onnar  sayȇrlar, ani yannışlıkların  avtomat  gözletmesi var kolay  üüseltsin   disţiplinayı  şoferların aaralarında  da yollarda da taa  raat  olacȇk  gezmää.

«Yol razgelmeleri taa aaz  olacȇk, taa çok  ştraf  olacȇk».

 «Elbetki,  lääzım. Şındı kasabada  okadar olay  var, açan   hızlılıı hic  esaplamȇȇrlar, da bu üzerä çok yol razgelmeleri  olȇr. Bän sayȇrım, ani  lääzım.»

«Hep sayȇrım, ani lääzım,neçin kasabada  çok  avariya razgeler. Var  bölä delibaşlar da, angıları  uşak  başcaların  hem  okulların yanında deli gibi haydȇȇrlar.Orada  sa  uşaklar.Pek  çirkin .Nicä ana -boba  uşaklar için  korkȇrız.»

«Lääzım  koruntu  için. Maşınayı olacek kolaylık  brakmaa  yolda. Şindi kimsey onda   gezmeer. İlerdän vardı nicä birkimsey  girsin,naşey sä  kırsın. »

«Elbetki, lääzım, ki çalmasınnar hem ayık gezsinnär.»

«Bän sayȇrım, ani lääzım koruntu için. Var esapsız şoferlar. Bunun için kameralar lääzım olsun. Elbetki para ederlär, ama lääzım olsunnar.»

Yakın vakıtlara  koyulu plana geçirmää konsultaţiyaları profil izmetlärlän hem uzmannarlan, nedän sora belli olacek plan  kamera koymasında  hem proekt yapılmasında vakıdı, haberledi Komrat primarın yardımcısı Viktor Baldji: « Taa bıldır başladıydı üç obyekttä   proekt işleri kamera konulmasında. Neetleriz proekt smeta dokumentlerini hem tehnik  kiyatların yapılmasını bitirmää, nedän sora gelän aftaya başlayacek verifikaţiya işleri. Sora da tender geçirilecek  kamera konmasında. Da bän sanȇrım, ani proţeduraya görä iki- üç ayın içindä onnar konulaceklar. »

Video gözletmenin avtomat sisteması şansora kullanılȇr devletin başka dolaylarında. Şindiki vakıt Moldova devletin yollarında çalışȇr monitoring yol kameraların baalantısı için,  o belli eder  hızlılıın üüselmesini, svetoforun kırmızı şafka geçmesini, telefon kullanmasını maşınada gidärkänä hem da kayışın koymamasını. Poliţiya haberlerinä görä bu sistema belli eder binnärlän yannışlık. Sade bir yılın içindä kameralar bell  ettilär 350 bin olay yol kuralların bozulmasında, ne gösterer bu tehnologiyaların faydalı çalışmasını.