Valkaneş kasabasında Gagauziya Aksakallar Nasaatın başı Vasily Arnaut iş buluşmasını geçirdi Valkaneş dolayın aksakallar nasaatın azalarınnan. Burada bulundular küülerdän hem kasabadan aksakallar, onnar çıkışları açıkladılar hem türlü önemni soruşları baktılar.
Aksakallar Nasaatın buluşmasında bakıldılar soţial önemni soruşlar, angılarına görä aksakallar var nicä yardımcı olsunnar terbi etmää genç evlad boylarını hem ilerletmää cümneyi. Gagauziya Aksakallar Nasaatın başı Vasiliy Arnaut haberledi, ani bölä buluşmaklar avtonomiyanın herbir dolayında geçeceklär.
«Bakȇrız — ne oldu bütün 2025-cı yılda, ne da etiştirämedik deyni yardımcı olalım küülerä, neredä yaşȇȇrlar bizim ihtär insannar. Neredä yaşȇȇrlar bir-birä,etişmeer hepsinä vakıt, hepsinä yardımcı olsunnar primariyalar, soţial işçileri, o beterä, neredä yaşȇȇr çok ihtär insan, biz savaşȇrız yardımcı olmaa, deyni bakmaa bizim ihtär insannarı da brakmamaa bir-birä. Problema var çok, ama biz savaşȇrız yardımcı olmaa»,- Vasiliy Arnaut haberledi.
Geçti yılın çıkışlarını belli etmektän kaarä, buluşmanın pay alannarı baktılar aktual soruşları, angılarınnan kaarşı gelerlär yaşayannar hem onnarın çözülmesini. Aksakallar urguladılar,ani bölä buluşmaklar vererlär kolaylık açıklamaa kendi düşünmeklerini hem barabar bulmaa kararları, dedi Aksakallar Nasaatın azası Nikolay Pançev: «Burada Vasiliy Romanoviç annattı, ne yapmış prezidium, ne lääzım yapmaa ileri dooru. Küülerdä aksakallar nasaatın azaları annattılar, ne yapmışlar iki yılın içindä hem ne var nicä yapmaa ileri dooru».
Buluşmanın sonunda pay alannar annaştılar ilerletmää barabar çalışmayı hem aktiv uurda pay almaa cümnenin yaşamasında.