Moldovanın agrariyaları yapȇrlar geçän yılın çıkışlarını hem notalȇrlar güzlüklerin halını bu kış. Bir kuraklık yılından sora 2025 yılın koşulları taa ii var nicä belli etsinnär kendilerini gelecek berekettä. Ama bununnan bilä kalȇrlar problemalar da, urguladılar uzamannar, topraan strukturasının diişilmesi, ucuz paalar boodaylara hem lääzımnık eni tehnologiyalara geçmää.
Devletin üülen tarafında bitki 6 yıl hava koşulları zordular, nışannȇȇrlar agrariyalar. Sadece 2021 -ci hem 2025-ci yıllar taa iiydilär bereketä deyni. Toplanıldı diil prost bereket, ama taa azdı, nekadar beklenärdi sayȇr agrariy Georgiy Paşalı: «25 yıl bereket tarafından diil prost, nicä üülen tarafında, ölä da poyraz. Büük paraları kabletmedik, ama gelirlär verdilär kolaylık üülen tarafından çorbacılıklara ayakta kalmaa. Ama paalar 2025 yılda ayırılȇrlar 2021-cidän dil ii tarafa».
Çiftçilär nışannȇȇrlar, ani petrol malların, beslemäk hem korumak malların paayın üüselmesi belli eder boodayın satmak paasına, angısı kalȇr küçük. Bu getirer ona, ani lääzım aaramaa içindeki resursları.
«Erlim ileri bizdä vardı kayıplar yılın bitkisindä, 2025 yılda biz biraz işlerimizi doruttuk, neçinki paa kalȇr hep bu uurda. Petrol hem beslemäk malların paayı da üüseler. Da agrariyalar çıkamȇȇrlar bu durumdan. Biz bekleeriz 2026 yılı, biz düşüneriz, ani nemnik toprakta var, da inanȇrız, ani ta ii yıl olacek»,- Boris Çervin, agrariy, sayȇr.
Ne baalı güzlüklärlän, onnarın halı ii. Çok çekilecek ilerki hava koşullarından hem toprakta nemniktän, nışannȇȇrlar agrariyalar.
«Biz bakȇrız hepsi tehnologiyaları, kullanȇrız toumnarı, angıları bizim klimata yarȇrlar. Bu verer kolaylık güzlüklerä girmää kışa ii halda. Ama hepsini çözecek ilkyaz nemnii»,- agrariy sayȇr.
«Biz geçtik eni tehnologiyalara, taa az süreriz topraa, yakın 10-20 proţent erleri biz eni tehnologiyalara işleeriz. Bu verer bizä kolaylıı korumaa nemnii hem taa ii olsun güzlüklerin halı».
Ȇkspertlär urgulȇȇrlar, ani Moldovanın baş resursu bu toprak. Okadarki onun halı şüpelendirer onnarı, urgulȇȇr professor Boris Boinçan. Onun laflarına görä, toprak kaybeder lääzımnı mikroelementleri.
«Biz alȇrız topraktan taa çok, nekadar vereriz geeri. Gumusun miniralizaţıyası gider hızlı, nekadar o doorulȇr. Bizim toprak kaybeder kendi funkţiyalarını».
Ta çok kurumnar geçerlär no-till hem sprip-till tehnologiyalarına, onnar vererlär kolaylık korumaa nemnii hem resursları.
«Biz brakıldık sürmektän taa 2006 yılda, da büün kullanȇrız eni tehnologiyaları, sürmeeriz topraa. Bu verer bizä kolaylıı nemnii erdä tutmaa hem aazaltmaa harcamakları».
«Becermeklär göstererlär, ani bizim koşullarda, stabil çıkışları vererlär Odessa selekçiyasının toumnarı. Onnar taa dayanıklı kuraklaa».
Uzmannar sayȇrlar, ani çiftçiliin gelecää — bu bereketin hem topraan kalitesinin aralarında balans. Ondan, nicä hızlı klimatın koşullarına sınaşacez, çekiler bizim devletin agrar sektoru.