Her yıl Gagauz Erindä üürenicilär avtonomiya bücetindän finans yardımını kablederlär. Bunun için 2022-ci yılda maasuz kanon kabledildi. Bu yıl bu yardımı kabletmäk için 15 561 danışmak verildi. Büjettän bu uura yakın 19 million 800 bin ley bakıldı. Bunun için “Dialog studiyada” programasında Gagauz Eri Üüretim bakannıın başı N.Kristeva söledi.
Okul için verilän finans yardımı sıradan üürenicilär için 1 bin ley kurȇr. Fukaarä, çok uşaklı aylelerdän uşaklar, yada onnar kimi anası ya bobası tek başına büüder taa 500 ley kablederlär. Gagauz Eri Üüretim bakannıın başı N.Kristeva söledi, ani finans yardımın verilmesinnän baalı iş ilerleer. Tezlää analar-bobalar bu paraları kabletmää başlayacȇklar.
NATALİYA KRİSTEVA Gagauz Eri Üüretim bakanı
«Okullar 15 561 danışmak kablettilär. Bu uura avtonomiyanın büjetindä 19 million 778 bin ley bakılı. Finans bakannıı kendi daavalarını artık yapȇr».
Okullar lääzımnı olan dokumentleri hazırlasınnar lääzım. Da versinnär onnarı finans kurumnarına. Bundan sora analar-bobalar okul için finans yardımını kabletmää başlayacȇklar.
NATALİYA KRİSTEVA Gagauz Eri Üüretim bakanı
«Okullar bu işi çemrek yaparsalar analar-bobalar bu yakınnarda paraları kabletmää başlayacȇklar. Finans bakannıı okullardan dokumentleri kablettiktän sora, banka danışacȇk. Bank ta kendi işini yapacȇk — kartalara paraları geçirecek».
Onnar, kim bu finans yardımını kabletmäk için banka kartasınını açmaa etiştirämedi yardımını kiyat paraylan var nicä kabletsinnär.