Gagauz Eri üüredicileri ödülleri kablettilär. 140 uzman, ani gagauz dilini lingval olmayan derslerdä ilerlederlär, hem multilingval üüretim sistemasını ilerlederlär, diplomnarı hem premiyaları kablettilär.
140 uzmanın, ani gagauz dilini lingval olmayan derslerdä ilerlederlär, hem multilingval üüretim sistemasını ilerlederlär, işini maasuz komisiya notaladı, çizgiledi Gagauz Eri Üüretim bakannıın başı Nataliya Kristeva: «Biz sayȇrız, ani bu üüredicileri desteklemää lääzım. Desteklemäk için kolaylıı Gagauz Eri Gagauz dilinin kullanmak sferasını genişletmäk için kanon verer. Premiyalar için yakın 500 bin ley verildi».
Bu üüredicilär resimcilik, zanaat, muzika hem fizkultura terbietmesi, vatandaşlık terbi etmesi hem başka derslerdä gagauz dilini kullanȇrlar. En küçük premiyalar 3000 ley. En üüsek tä — 4 500 ley. Üüüretim bakannıı artık çıktı iniţiativaylan, ki bu ödüllär başarılı üüredicilerä her yıl verilsinnär. Ödülleri hep ölä kablettilär üüredicilär, angıları Didaktika proektleri konkursunda ilk erleri aldılar. Bu üüredicilär Gagauz dili hem literaturası, Rumın dili hem literaturası predmetlerindä didaktika proektlerini tanıttılar. Komisiya onnarı notaladı.
«Başlankı klaslar için Gagauz dili hem literaturası eni kurikuluma görä dä didaktika proektleri vardı. Bu eni bir ȇtap bizim üüretim sistemamız için! Biz annȇȇrız, ani üüredicilerimiz temelli bir işi yapȇrlar. Rumın dili üüredicileri için türlü kaynaklar var. Onnara biraz taa kolay, ama gagauz dili üüredicilerinä gerçektän zor geler. Bu üzerä butakım konkursların yardımınnan biz metodika materiallarımızı zeedeletmää isteeriz»,- Nataliya Kristeva çizgiledi.
Üüüredicilär çizgiledilär, ani busoy konkurslar onnara ileriya dooru işlemää ihlam hem kuvet vererlär.
«Proektlerä havezlän katılȇrız. Hem bän, hem benim kolegalarım».
«Bu yardım bizä ihlam verer».
Multilingval üüretmäk sistemasını Gagauz Erindä 2021-ci — 2022-ci üürenmäk yılında geliştirmää başladılar. Büünkü gündä bu sistemaya görä 41 okul işleer. Üüüredicilär kendi professionallıını ilerlederlär, üürenicilär sä gagauz, rumın, englez dillerindä kendi bilgilerini kaavilederlär.