Moldovanın üstiţiya ministerlii yolladı Konstituţiya daavasına danışmayı kontrol etmää «Gagauziya ayırı hak statusu için» kanonun kimi statyaları.
Üstiţiya ministrusu Vladislav Kojuhar mardın 9-da danıştı Konstituţiya daavasına yalvarmaklan kontrol etmää «Gagauziya ayırı hak statusu için» kanonun kimi statyalarını. Üstiţiya ministerlii isteer kontrol edilsin tekst «seçimnerin geçirilmesindä Merkez seçim komisiyasının kaaviletmesi»-GHT kompetenţiyasının birisi. «Merkez seçim komsiyası» termini bu kanonda karşı konȇr Moldovanın seçim kodeksinä, neredä hep bu organ adlanȇr «Merkez seçim soveti». Üstiţiya ministerliin danışması diyer kanonun te bu punktlarına:
36-ci statyasının birinci punktunda söleniler: «Gagauziyanın Merkez Seçim sovetin sayısını kaavileder GHT, alarak esaba «Gagauziya ayırı hak statusu için» kanonun 12-ci statyasının 3-cü payın d) punktunu hem erindeki normativ aktlarını;
155-ci statyasının birinci punktunu, neredä GHT normativ aktları belli ederlär regional seçimnerin kurulmasını hem geçirilmesini, alarak esaba «Gagauziya ayırı hak statusu için» kanonun kararlarını hem şindiki kodeksini.
Danışmaya görä Konstituţiya daavası lääzım olacek versinnär notalamayı belli edilän kararlara hem belli etsin cuvap ederlär mi onnar Konstituţiya normalarına. Daava kararı var nasıl önemni olsun kuvet organnarın işin kontrol etmesindä Gagauziyada da, sayȇr GHT başın işini götürän Nikolay Ormanji, angısı çıktı iniţiativaylan geçirmää GHT sırasız oturuşunu.
«Bu sabaa bän yazdım bildirimi da çaardım GHT prezidiumun oturuşunu. Danıştım, ki yaarına geçirmää sıradan oturuşu, ama konuşup kolegalarlan kablettik kararı maasuz oturuşu bu soruşta bakmaa Sali günü saat 11-dä sabaaylen Komradın kultura evindä da teklif etmää Moldovada bulunan hepsi diplomatik misiyalarını, üstiţiya ministerliini, parlament deputatlarını, eks-başkannarı hem hepsi primarları hem sovet başlarını, ki vermää notayı bu yaptıklara hem adımnara. Bölä formatta oturuşu geçirmää isteeriz hem plannȇȇrız deklaraţiyayı yada bildirimi kabletmää. Sali günü maasuz oturuşu geçirecez, bizdä olsun vakıt hazırlanmaa ona»,- Nikolay Ormanji nışannadı.
Hep ölä Konstituţiya daavası kontrol edecek normaları, angıları baalı Gagauziya Başkanın haklarınnan koymaa devlet organanrın teritorial bölümneri başlarını- poliţiya bakannıında, üstiţiya organnarında, hem Moldova Korumak hem haberlemäk izmetindä.