Kırbaalı küüyü -Gagauz avtonomiyasının en küçük yaşamak erin biri. Şkola burada yok, uşak başçasına 9 uşak gezerlär. Erli kuvet temsilcileri büün savaşȇrlar yapmaa hepsini, ki uşaklar uşak başçasına havezlän gelsinnär hem vakıdı burada faydaylan geçirsinnär.
Kırbaalı küüyü uşak başçasında uşakların komfortlu bulunmasına deyni hepsi koşullar hem herbir iş var. Enilenmiş grupalar, oyun içerleri, sanitar odaları. Suuk zamannarda binada sıcak, yısıtmak sistemaları işleerlär uygun, nışannadı terbiedici Alla Dermenji: «En ilkin heptän başkatürlüydü. Kışın suuktu, uşaklar kat-kat giimniydilär. Şindi taa kolay, uşaklar pek islää duyȇrlar kendilerini, uygun kaçınȇrlar, oynȇȇrlar. Ozamannar sa taa sobaları yakardılar, ama düzüntücülük işlerindän sora biz sobaları koruduk».
Düzüntücülük işlerini yaparkana esaba alındılar hepsi inceliklär. Duvarların benizi, aydınnatmak sisteması, sanitar odaların durumu. Uşak başçasında büün var lääzımnı mobila, metodika materialları, oyuncaklar, nışannȇȇr Alla Dermenji: «Duvarların benizi açık, uygun. Bizdä herbir lääzımnı iş var. Uyumak odasında herbirinä deyni kendi kirvatçıı var. Oyun odaları, imäk odası, sanitar odaları kızçaazlara hem çocucaklara deyni».
Lääzımnı işlär yapıldılar binanın dışaanda da. Uşaklara deyni oynamak erleri düzüldülär, büün onnar raat hem korkunçsuz burada oynȇȇrlar.
Tatyana Kiosä Kırbaalı küüyü primarı: «Biz savaştık yapmaa herbir işi uşaklara uygun olsun deyni. Her yıl korutmaa finansları savaşȇrız hem uşak başçası problemalarını çözmää».
Kırbaalı küüyü primarı çizgileer, ani küüydä annȇȇrlar, ani az sayılı uşak başçalarında da uşaklara deyni hepsi lääzımnı koşullar olsunnar lääzım. Bunun için dä uşak başçası kalȇr küüyün merkezi gibi, neredä herbir uşak uygunuk hem sıcaklık duyȇr.