Tülüküüdä «Yıllar geçtiktän sora dostlarlan buluşmak» yaratmak avşamı geçti. Şen atmosfera bu avşamda toplandı barabar yaşayannarı hem gagauz artistlerini.
Geçirmää bölä muzikalı buluşmayı teklif etti iki dost, Sergey Buyuklı hem Ilya Êkonom. Onnar artık çok yıl Sankt-Peterburgta yaşêêrlar, ama savaşêrlar Ana Topraannan baalantıları kaybetmemää hem ilerletmää gagauz kulturasını da bulunup Sankt -Peterburgta «Gagauzlar Birlii» kurumunda.
Bu sıra, gelip ana küüyünä iki dost kararladılar insannara baaşlamaa ayırı bir avşamı avtor türkülerinnän, derin êmoţiyalarlan hem buluşmaklarlan yakın insannarlan. Bölä konţertin hazırlaması için ideya oldu Ana Topraamıza gelärkana, dedi Sergey Buyuklı. O nışannadı, ani savaşêr taa nekadar sık uzaktan Tülüküüya dönmää.
«Üüreemizä ölä geldi taa çıkarkana burayı, ölä geldi akılımıza da, bekim insannar orada toplanaceklar. Bu yıl ölä uydu, ani hem Paskelledä hem Paskellä dokuzuna biz gelelim, bu günnerdä Gagauziyada toplanȇr çok insan вырезать düşündük ani insannar bukadar olursaydılar burada yapalım onnara bir parça bizi diil aniii getirtsinnär aklılarına, ama verelim onnara bir sevinmelik»,- dedi Sergey Buyuklı.
İlya Êkonom söledi, ani neredä da olmasa insan, onu hep okadar çeker kendi taraflarına.
«Yortu yapalım bu insannara, burayı geldynän lafettik bizim dostlarımızlan, onnar da kayıl oldular, olȇr bir konţert büün»,- İlya Êkonom söledi.
Bölä tekliflär önemni diil sade küüyün kultura yaşaması için, ama pek lääzımnı ki taa sık baalantılar olsunnar insannarın aralarında, -dedi primar Natalya Popova: «Bizdä bu avşamı götürecek onun programasını yapacek bizim küüyün yaşayannarı, Sergey Tihonoviç hem İlya Dmitrieviç. O insannar, ani koydular bütün kendi yaşamasını, kendi türkülerini, kendi zanaatlarına, onnarın sayısında bizim küü için, bizim insannar işiderlär hererdä. Onnar çok paalı insannar bizim küüdä, saa olsunnar, onnar büün toplȇȇrlar bukadar insan, şennik yapȇrlar, biz da onnara saa ol deeriz».
Konţert programasında taa pay aldılar gagauz artistleri da- Andrey Palik, gruppa «Tozi», Irina Gerasimova, Anna Zabun, Ivan Kisakov hem taa başka muzikacılar.