İstoriya, sayfaların içindä dirildi. Komratta aaraştırıcı Valeriy Kıssanın eni kiyadın prezentaţiyası geçti. «Komrat hem komratlılar» kiyadı — bu insan kaderlerinin, sokakların hem Gagauziyanın baş kasabasının görüşünü kuran olayların letopisiydir. İlerleder temayı bizim korespodent.
Komrat için kiyada material toplamaa deyni avtor Valeriy Kıssa bir yıldan zeedä çalıştı: temelä girdilär arhiv dokumentleri, eski foto-kartalar hem en önemnisi — erli insannarın cannı anmakları.
VALERİY KISSA kiyadın avtoru
«Çalıştım, ki o olsun herbir insana deyni, bilgi açık olsun bizim okuyuculara. Çok var eni bilgi, angıları hiç bir erdä yok, eni fotolar, angılarını bän buldum Komratımız için büük yaşta insannardan. Umut ederim, ki kiyat olacek eni bir istorik hem faydalı yapım bizim istoriyamızı üürenmää deyni: üredicilerä, herbirisinä, kim meraklanêr bizim kasabanın istoriyasınnan.»
Eni yaratma işi Komrat için lääzımdı çok arhif haberlerini toplamaa, angıları yavaş-yavaş kaybelerlär. Avtor Valeriy Kıssanın laflarına görä, kiyadın baş neeti — kaybelän olayları hem hronikalarını gelecek evlat boylarına deyni korumaa.
VALERİY KISSA kiyadın avtoru
«Material toplamaa her-günä zorlaşêr — insannar , paalı bilgilär kaybelelär. Kiyada girdilär komratlıların soy arhivlerindän eksklüziv fotolar, hem da faktlar, angıları aşırı bir erdä basılmadılar. İsteerim, ki bu iş olsun faydalı bir üürenmäk materiyalı üüredicilerä hem hepsi için, kimä paalı duuma kasabanın istoriyası.»
Prezentaţiyanın musaafirleri — istoriklär, kultura insannarı, ihtiarlar hem gençlär. Birileri sayfaları çevirer, birileri kendi bakışlarınnan paylaşêr. Muusaafirlär nışannȇȇrlar, ki bölä iş — regionun milli anmasına hem kultura zenginniinä paalı bir baaşış.
DMİTRİY GRADİNAR Komrat kasabasının yaşayanı
«Bu kiyadın tiparlanması çok önemni. Büük saa ol avtora Valeriy Födoroviçä, ki o başardı bulmaa bölä materialları, angılarını her erdä bulamazsın… Bän te biraz açtım bu kiyadı hem buldum mamumun fotosunu. Bu çok paalı, bän gösteräbilecäm kendi çocuklarıma hem torunlarıma bizim soyumuzu, angı çoktan başlêêr».
Komratın istoriyası — bu ilk öncedän onun insannarı. Valeriy Kıssanın eni kiyadı topladı anılmış hem çalışkan kasabalılar için materialları, kimin başarları hem zanaatı lääzım genç komratlıları ilhamlasın.
ALEKSANDRA SERBİNOVA Komrat kasabasının yaşayanı
«Pek lääzım bölä kiyatlar . İnsan lääzım bilsin kendi soyunu edi nesilädän. Ama şindi iki-üç nesili da bilmeerlär. Onun için bölä kiyatlar pek önemni, ki bilmää kendi soyunu, kendi dilini, kendi halkını, kendi aylesini».
Prezentaţiyada gösterilän kiyat topladı Komrat istoriyasının baş olaylarını hem insannarın kaderlerini, kim kazandı kasabanın gelişmesinä. Prezentaţiyanın pay alanların bakışlarına görä, bölä yartamalar vererlär genç nesilä dooru yolları.
STEPAN KARA Komrat kasabasının primarın yardımcısı
«İsteerim ilk öncedän paalı saol demää Valeriya, bu kiyadın avtoruna, ki o yarattı bölä eksklüziv materialı. Çünkü son zamannarda çok kiyat yazılmêêr bizim kasaba için, bizim kasabanın istoriyası için. Çünki olaylara bizim Komrat kasabamız pek zengin.»
«Komrat hem komratlılar» — bu kasabanın geçmişi hem geleceyi arasında bir köprüdür. Hem şindi herbir isteyän var nasıl olsun ilişikli bu istoriyaya.