Gagauziyadan sportçular taa bir keret gösterdilär üüsek becermeklerini halklararası arenada. Kikboksing dünnä kuboonda, angısı geçti Belausiyada Minsk kasabasında canavar ayın 15 dän 21 dan. Yarışmalarda pay aldı 22 devlet. «Oguz fight» klubun sportçuları kazandılar üç ödül — iki altın hem bir gümüş ödül. Nicä büün terbiederlär çempionnarı üürendi bizim korrespondent.
Kikboksing dünnä kuboo topladı en kaavi dünyanın sportçularını. Kaavi konkurenţıyada Gagauziyanın sportçuları gösterdilär kendi karakterini hem üüsek hazırlanmalarını. Nicä urguladı düüşçü Födor Kazanjı yol pek uzundu hem zordu 60 saat bir tarafa hem 60 geeri, angıları belli ettilär kendilerini spotçularda hem trenerlarda, ama buna bakmadaan biz topladık kuvetlerimizi da üüsek uurda pay aldık yarışmalarda.
Födor Kazancı, K-1 Dünnä kuboo gümüş ödülcüsü, nışannadı: «Bän geçirdim üç düüş, ilki geçirdim sportçuylan belarusiyadan, ikinci konkurentım Pakistandandı, ama üçüncü bendä düüşçü rusiyadandı, angısına bän tarattım, sayıylan 1-2. Amma bu diiläzım olsun bana deyni gerekçe, neçinki düüşü bän tarattım».
Kuboon çempionnarı oldular Egor Vlah hem Aleks Payu, angıları ensedilär kendi kaavi konkurentlarını kendi çeki kategoriyalarında. Nicä urguladılar sportçular düüşlär geçtilär kızgın hem becerikli, hem onnar gösterdilär ani altın ödülleri kazandılar kendi terinnän.
«Bän geçirdim 4 düüş, hepsi benim konkurentlarım Belarusiyadan dı. Hepsi onnar kaaviydilär, düüşlär da zordular».
«Bän geçirdim üç düüş, birisi sportçuylan Rusiiya devletindän, ikisida Belarusiyadan. Düüşlär geçtilär ii, ikisini puannara görä taradım, fanaldada priyömlara görä taradım».
Stas Verbin angısı hep üüsek uurda geçirdi bir düüş pek kavi konkurentlan Rusiya devletindän, o düüştü bitkiyadan, amma tarattı. O kullandı hepsi kendi becermeklerini, kuvedini hem karakterını.
Stas Verbin dünnä K-1 kuboon payalanı: «Benim konkurentım Rusiyadandı, da o professional kendi uurunda. 24 düüşü var üüsek arenalarda, var kolanıda, o pek kaavi konkurent, bana deyni. Bän gösterdim gözäl hem kaavi düüşü».
Sportçular nışannadılar ani büük iş yapıldı trenerlarlan, ki etişmää deyni bölä üüsek uura. İgor Petkoglonun çalışkanıını, sigurluu hem sevgisi kendi işinä oldular bu taramakların temeli. Maasus o üüreder uşaklarda disţiplinayı, karakterı, düüş ruhunu, angısı yardım eder çıkmaa ringa da taramaa urguladılar sportçular. Bakmadaan ona ani klubun kumbarası her yıl zeedelener eni ödüllärlän , spotçular hergün gelerlär zala ki kaavileştirmää kendi ustalıını. Şindi onnar hazırlanerlar Moldova çempionatına neredä pay alaceklar klubun taa çoyu terbiedenneri. Oguz- Fight — bu kuvet, şkola hem kikboksingın gelecää gagauziyada, moldovada.