Küçük ayın 9-da  kendi profesional yortusunu nışannȇȇrlar  dış doktorları. Onnarın unikal işi için annadȇr bizim korespondentımız.

Diş doktoru  Vladislav Kreţu çalışȇr 25 yıl. O  nışannadı, ani en önemni onun işindä  — paţientlär, angıları giderlär evä saalıklı hem gözäl  gülüşlän. Herbir paţient- bu ayırı istoriya, angısını lääzım esaba almaa, profesional tarafından ona yaklaşmaa. 

«Bän sayȇrım, ani en önemni bizim zanaatımızda — sevmää kendi işini,  bütün candan onu yapmaa. Bana taa bobamdan sevgi bu işä kaldı,  gelärdim ona işä, da kararladım olmaa diş doktoru. Bän  sevinerim, görüp insannarın üzlerindä gülüşü»,- Vladislav Kreţu nışannȇȇr.

Büünkü  stomatologiyada kullanılȇr eni tehnologiyalar, ama doktorun baş  davaası- korkunçsuz  geçsin ilaçlanmak, Vladislav Kreţu urguladı: «Bizim zanaatımızda çok tehnologiyalar var. Birisi onnardan benim gözlerimdä, bu lupalar, angıları diiştirerlär diş doktorun dünnesini bütündän. Taa ne diişer?  Bän bilerim, ani var  kompüter tomogrammaları, erindä yapȇrlar rentgen. Bu insannara deyni komfort olsun. Biz gideriz tehnologiyalarlan ileri». 

Stomatolog bu taa psiholog da.  Maasuz açan laf gider paţientlär için, angıları yıllarlan  danışmȇȇrlar doktorlara, çünkü korkȇrlar gelmää. 

«İnsannar lääzım  makar iki keret yılda danışsınnar diş doktorlarına. Erli onnar vakıdında geleceklär bizä, biz   vakıdında çekedecez ilaçlamaa.  Ozaman bu azaldacek onnarın gelmesini  bizä».

«Makar üç ayda bir keret danışmaa  stomatologlara lääzım profilaktika bakılması için. Ne bän isteerim dilemää, ilk doktorlarda saalık olsun». 

Stomatolglar nışannȇȇrlar,  ani ayırdılar bu zanaatı  canına görä da onnarın missiyası yardım etmää insannara.

«Bän sayȇrım, ani en önemni  bizim zanaatımızda , nicä da başka iştä, bu sevmää kendi işini, da verilmää ona bütün cannan hem üreklän. Neçin bän ayırdım bu zanaatı? Taa küçüktän istäärdim  olmaa doktor. Da bän sevinerim, görüp insannarın sevgili gözlerini hem gülüşünü hem saalıklı paţientları»,- stomatolglar nışannȇȇr.

Herbir gözäl gülüşün ardında- doktorun işi. Uzmannar  ilerlederlär  her gün kabletmää hem ilaçlamaa insannarı, düşünmää onnarın saalıkları için hem kaldırmaa verilän koşulların kalitesini, ki paţientlär korkmasınnar da vakıdında danışsınnar  medik yardımı için.