Tülüküüyü “Gün duusu” uşak başçasının gagauz dili üüredicisi Lüdmila Lefterova zanaat yoluna bir buçuk yıl geeri adımını yaptı. Bu kısa vakıdın süresindä o annadı, ani bu zanaat ona uşaklara Ana dillerini sevdirmää kolaylık verer.
Lüdmila Lefterova genç üüredici, angısı kendi zanaat yolunu ayırarkana kendi Ana küüyünü seçmiş. Komrat kasabası M.Çakir kolegini başardıktan sora Tülüküüyü “Günduusu” uşak başçasına işlemää gelmiş. Annadȇr, ani üüredicilii ayırmaa ona yardımcı olmuş bir olay.
«Nesoy benim geldi aklıma üüredici olmaa? Bän ilk üüredici kendi aylemdä. Açan bän taa uşak başçasına gelärdim hem bitki gün uşak başçasında bizä yortu yaptıydılar. Bizim bir terbiedicimiz Anna Nikolaevna Zabun bir aaçta yazmıştı kim, angı işi ayıracek büüdüynen. Lüda Lefterova yazılıydı vospitatel»,- Lüdmila Lefterova annadȇr.
Üüredici olmaa deyni diil sade bilgi hem becermäk, ama üürendän duyguların hem sevgi uşaklara lääzım olsun, nışannȇȇr Lüdmila.
«Bän bu işi beenerim, mayıl olȇrım üüredicilerä . Benimcä üüredici o olä bir kişi –o bir kahraman. Bu zanaatı ayırmaa deyni duygu canından gelsin lääzım-bu iş için dä bän ayırdım bu zanaatı. Bän ölä bir üürediciyim, angısı beener kendi işini, yaşȇȇrım kendi işimnän, bana deyni beni beensinnär uşaklar, bana başka bişey lääzım diil. Uşaklar beni beenerlär, bän dä beenerim uşakları-bana kolay»,- Lüdmila Lefterova annadȇr.
Ana dilini üüretmää hem onu uşaklara sevdirmää deyni uşak başçasında hepsi lääzımnı koşullar hem tertiplär var. Uşaklar, ana-bobalar bu proţestä aktiv pay alȇrlar. Yardımcı bu uurda olȇr multilingval üürenmesi programası,nışannȇȇr Lüdmila: « «Antem» programasınınnan işleeriz , onunnan kolay işlemää, neçin deyni o neyi geçeriz gagauz dilindä, onu rumun dilindä da geçeriz. O programada toplu ölä temalar, angıları uşaa lääzım olaceklar hererdä. “Neredä bän bulunȇrım, ne yapȇrım, angı zanaatları severim, benim evim , benim Moldovam”-bu temalar. Herbir temanın sonunda var sınışlar, angılarını analar hem bobalar lääzım yapsınnar. Bundan kaarä bizdä var derslär, angılarında aktiv pay alȇrlar ana-bobalar. Bän kasım ayında geçirdim bir yortu hazırlık grupasında, 19 uşaktan 18-nin ana-bobası olaya geldi hem katıldı».
Uşaklara gagauz dilini sevdirmäk – bu prinţipi Lüdmila Nikolaevna hergünkü işindä kullanȇr.
«Hep savaşȇrım hem herkerä söleerim, ani beensinnär kendi Ana dilini, koorusunnar, sevsinnär onu . Nereyi dä gitmärsäniz bilin, ani sizin var eriniz, Vatanınız hem diliniz»,- Lüdmila Lefterova annadȇr.
Lüdmila Nikolaevnanın zanaat yolu o regionun üüretmäk sistemasında çalışan gençlerinä deyni halkımızın kulturasını hem dilini ilerletmesindä örnek olȇr.