«GHT seçimnerin hak hem instituţional temeli» seminarın teması, angısı Komrat kasabasında geçti. Onu kurdu hem geçirdi ADEPT asoţiaţiyasının Pres klubu, angısı işleer açık seçimnär proţeslerin geçirmesindä hem demokratiya institutların kaaviletmesindä devlettä.
Seminarın neeti — hertaraftan yapmasa analiz normativ strukturasına hem instituţional mehanizmalara, angıları kurȇrlar hem geçirerlär seçimneri Gagauziyada belli edip bu seçim proţesin özelliklerini hem onnarın göstermesini erindeki avtonomiyanın çalışmasında. MD MSK başın yardımcısı Pavel Postika temsil etti bakışı seçim kanonnarın kullanmasında hem Gagauziya kuvetlerinnän barabar çalışmasında.
«Moldova devletin hem Gagauziyanın merkez seçim komisiyaları tehnika uurunda belli ettilär 10 baş punktu, angıları lääzımdılar esaba alınsınnar, ki MD kodeksi seçimnär için hem Gagauziyanın kodeksi seçimnär için olsunnar bir uurda. Biz onnarı baktık da kaldı üç moment, angılarını politiklär lääzımdı belli etsinnär»,- Pavel Postika annattı.
Pavel Postika nışannadı, ani bakmaklardan hem açıklamaklardan sora kaldı 3 punkt, angıları baalı Gagauziyanın merkez seçim sovetin işinnän.
«İlk soruş baalıydı Gagauziyanın MSK finanslamasınnan. İkinci soruş — nicä geçirileceklär seçimnär milli hem regional uurlarında, ki olmasınnar yannışlıklar hem dolaşmaklar. Hem üçüncü o, ani Gagauziyanın merkez seçim komisiyası yada merkez seçim soveti. Te bu üç punkt kaldı politiklerin bakışlarına hem kararlarına»,- Pavel Postika nışannadı.
Açan GHT kabletti kararı diiştirnmää Gagauziyanın seçim için kodeksi hem MSK azaların salvermesi için respublikanın MSK kararladı GHT kararını saymaa kanona karşı nışannadı Pavel Postika: «Biz bakȇrız bölä – MD seçimnär için kodeksindä eklemäk punktlarında yazılıydı birzamankı kurallar, neçinki Moldovanın seçim organnarında Gagauziyanın seçim sovetin başı hem sekretari olȇrlar dolay seçim sovetin öndercilerinnän, ki geçirmää prezident hem parlament seçimnerini. Hep ölä yazılı, ani onnarın iş vakıdı maanasız hem sebepsiz bitärsäydi MD merkez seçim komisiyasının var hakı Gagauziyanın merkez seçim sovetin başını hem sekretari koymaa seçimnerin geçirmesi için. Biz bunu yaptık».
Seminarın süresindä er verildi soruşlara, angıları baalıydılar seçicilerin hakların korunmasınnan. Pay alannara annattılar, nicä belli etmää hem sayıya koymaa yannışlıkları, nicä işlemää haberlärlän seçimnerä karşı hem nicä jurnalistlär var nasıl yapsınnar ölä, ani insan inansın seçim sistemasına. Kurucular nışannadılar, ani bölä olaylar yardım ederlär erindeki uzmannara kompetenţiya uurunu kaldırmaa hem kurmaa cuvaplı katılmayı seçimnerä.