Çok-Maydan küüyü F.Yanioglo adına liţeyindä rumın dili zamandaş kabineti açıldı. Proekti Üüretim ministerlii hükümetin yardımınnan geliştirdi. Baş neet — devlet dilini üüretmäk hem üürenmäk için uygun hem kaliteli koşullrı kurmaa. Bu kabinettä interaktiv tablası koyuldu, verildilär lääzımnı kiyatlar, sözlüklär, didaktika materialları verildilär. Tezlää burada eni mobila da peydalanacȇk. Bu enilikleri geliştirmäk için devlet bücetindän 100 bin ley verildi.
Çok-Maydan küüyü F.Yanioglo adına liţeyindä rumın dili zamandaş kabineti açılışında bulundular Üüretim ministerliin temsilcisi İ.Duminika hem Üüretim bakannıın başı N.Kristeva. Onnar burada kurulu koşulları notaladılar hem üüredicilerin işi için geniştän üürendilär. İ.Duminika açıkladı, ani rumın dili zamandaş kabineti üüretim kurumunda olasun deyni, üüretim kurumu maasuz standartlara uysun lääzım. Bu sayıda: dillerin kaliteli üüretmesi hem üürenmesi, olimpiadalarda hem türlü konkurslarda başarılar.
İVAN DUMİNİKA
Üüretim ministerliin temsilcisi
«Bizim baş neetimiz rumın dilini üüretmäk için ugun koşulları kurmaa. biz isteeriz, ki üürenicilerimiz devlet dilindä serbest lafedäbilsinnär. Bu kabinettä zamandaş ȇlektron tablası var. Hepsi lääzımnı kiyatlar, sözlüklär, didaktika materialları verildilär. Tezlää burada eni mobila da peydalanacȇk. Bu proekti geliştirmäk için devlet bücetindän 100 bin ley verildi».
Çok-Maydan küüyü F.Yanioglo adına liţeyindä, nicä çizgiledi Üüretim bakannıın başı N.Kristeva üürenicilär kendi becerikliini üüsek uurda göstererlär. “Burada üüredicilär eni metodika yaklaşımnarını kullanȇrlar. Avtorluk ideyalarını geliştirerlär. Bu işin sonuçları konkurslarda hem olimpiadalarda belli olȇrlar”, — çizgiledi N.Kristeva.
Bu yılın mart ayında rumın dili zamandaş kabineti Kıpçak küüyünün B.Yanakoglo adına liţeyindä açıldı. Şindi Çok-Maydan küüyündä. İlerdä taa birkaç busoy proekt geliştitilecek Gagauz Erinin başka üüretim kurumnarında.