Ondan sora nicä Aleksandru Muntänu görevindän çıktı, cümnedä o ilk keret komentariyasını bu karar için açıkladı.Lafederäk jurnalistlärlän, o nşannadı,ani gider açık üzlän hem neetli professional uurda geçirmää işleri.
Aleksandru Muntänu Moldova premyer-ministrusu, söledi: «Benim üzüm pak. Yaptım hepsini, ne lääzımdı yapayım. Şindi illerlederim işi götürmää,nicä kendi daanışmamda urguladım.Bän uslu hem professional uurda geçirecäm işleri.Bulunȇrız evropa integraţiyasında da yok nasıl bu yoldan sapalım yada kuralım durumnarı,angıları var nicä getirsinnär politika kavgalarına. İllerlederiz çalışma».
Aleksandru Muntänunun iştän çıkmasından sora,çeketti Konstituţiyaylan belli edili proţedura, eni hükümetin kuruluşu. Moldovanın prezidenti Maya Sandu urguladı,ani konsultaţiyaların datası taa diil belli,ama onnar lääzım geçirilsinnär bu afta.Ama bu vakıtta Soţialistların Partiyası (PSRM) hem Milli Alternativa Akıntısı (MAN) nışannadılar,ani konsultaţiyalarda pay almayaceklar. Soţialistlär urgulȇrlar,ani kayıl geçirilsinnär vakıtsız parlament seçimneri, da sade bundan sora kayıl lafetmää kandidaturalar için. MAN başı İon Çeban da hep nışannadı,ani partiya pay almayacek konsultaţiyalarda hem kayıl geçirilsinnär vakıtsız parlament seçimneri. Prezident nışannadı bu işä,ani bu o kuvetlerin hakı.
«Bu onnarın konstituţiya hakı. Sanȇrım,ani bu ii, er onnar kullanarslar o hakı,ama karar onnardan çıkȇr. Biz lafedecez onnarlan,kim gelecek»,- Moldovanın prezidenti Maya Sandu urguladı.
Jurnalistlerin soruşlarına, bakılȇr mı Vasile Tofanın kandidaturası premier-ministrunun görevinä, Maya Sandu cuvap verdi,ani kandidaturalar için lafetmää taa erken.
«Biz lafetmeeriz bir da kandidat için. İlkin lääzım geçsin konsultaţiyalar parlament frakţiyalarınnan, bundan sora var nicä olacek lafetmää kandidatlar için»,- Maya Sandu urguladı.
Konsultaţiyalardan sora, prezident çıkaracek kandidaturayı premier-ministrunun görevinä, angısı lääzım olacek temsil etsin hükümetin programmasını da kabletsin parlamentin inanmak votumunu. Eni hükümet kurulmarsa, Konstituţiyaya görä, gelcek sıra proţeduraya,angısı var nicä getirsin vakıtsız parlament seçimnerinä.