Gagauziyada petrol malların etmemezlii duyulȇr. GHT-nda  hükümetä danıştılar , ki karışsınnar bu duruma. HT başı Valentin Ormanjı açıkladı , ki petrol malları satmak stanţiyaları karşı gelerlär problemaylan, angısı baalı petrol malların etmemezlinnän, onuştan teklif etti maasuz buluşmayı merkez hükümetinnän geçirmää.  Milli uurunda energetika agenstvosu haberleer, ani 75 petrol malların satmak erlerindä dizel yok , 27-sindä sa benzin. Bakarak geçti aftaya bu sayılar azaldılar , ama devletä potrol malların getirmesi durgunmadı. Taa deerin durum için süjetımızda üürenecez.

GHT başı Valentin Gaydarjı çizeledi, ki nekadar taa hızlı petrol malların etmemezlinnän durumu lääzım kararlamaa, belli etmää durumun sebeplerini , ki insannarda kolaylık petrol malları satın almaa olsun , ayırı yaşayannara , kim çiftçilik uurunda çalışȇr.

VALENTİN GAYDARJI   GHT başı

«Her çiftçilerdä olmarsa lääzımnı sayıda petrol malları , bu var nasıl onnarın işlerini durgutsun sora da dolay ȇkonomikasını da. Onuştan bän sanȇrım , ani bu durum çemrek lääzım kararlansın. Bän istämeerim , ani bitki-bitkiyä bu problema krizisä bizi getirsin. Bän , nicä GHT başı danışmakları hükümet kurumnarına yolladım , angıları bu durumnan baalı».

Petrol malların etişmemezlinä  çiftçilär  söleerlär harçların büümesi için. Boodayı toplamak vakıdında petrol malların varlıı – onnara en önemni soruş kalȇr.                                                                                                             

SERGEY GONÇAR  Çadır dolayın çiftçisi

«Siz bilersiniz mi, bütündän baktıynan paaların kalkmasına , en ilkin biz çekederiz sayıklamaa, sata bilecäm mi boodayı , ki biraz kazanmaa. Her olmarsa bizä uygun işlemää – ozaman biz bankrot olacez».

İVAN MARDAR   Komrat dolayın çiftçisi

«Büün ekinin paası 3 ley tutȇr, petrol malları sa 32-33 ley. Pek paalı çıkȇr. 1 litra petrol mallarına 11 kila ekin geler. Hepsini paası kalkȇr, ayırı petrol hem gübrülemäk mallarına. Birkaç sıra telefonu açtım, ki satın almaa petrol mallarını. Getirmedilär nekadar çeketmedän istedim, ama 3-4 tonna aldım».

Dolayın yaşayannarı açıklȇȇrlar , ki bu durum onnarı da düşündürer, neçinki petrol malların etişmemesinnän karşı gelerlär.

«Bän vardı geldim, da bana dedilär , ki dizel yok. Burada da birkaç sıra yoktu. İşittim , ani 40 litradan zeedä petrol mallarını satmacaymışlar».

«Elbetki, zor. Petrol malların etmemesi duyulȇr. Bunnarı hepsini hükümet esaba alsın lääzım».

«Vardı esap aldım bunu. Ayırı açan  paası kalkȇr problema var».

«Şindi hepsinä deyni bu durum duyulȇr , ayırı çiftçilik azalarına. Petrol malları etmeerlär, bilmeerim ne yapacez, neçinki boodayı toplȇȇrlar şindi ».

«Görersiniz nesoy durum şindi. Petrol malların paası kalkıp iner. Sanȇrım , bişey ii bizi beklämeer bu uurda».

Miili energetika agenstvosu sa çizgeler , ani petrol malların panayarında malların varlıı halklararası dumundan belli olȇr.

MİİLİ ENERGETİKA AGENTSTVOSU

«Bakmayarak te ona , ani günün süresindä birkaç petrol mallarını satmak erlerindä bir parça vakıda var nasıl olmasın mallar, devletä onnarın getirilmesi durgunmȇȇr», — haberleer Miili energetika agenstvosu.

MD prezidenti Maya Sandu açıkladı, ani energetika uurunda vaarlıın hem petrol malların paasın kalkması hep  dünnä durumunnan baalı. Onun laflarına görä, hükümet lääzım hazır olsun taa da zor duruma .

MAYA SANDU MD Prezidenti

 «Ȇlektroenergiyanın paası baalı yaamurlarlan hem Dunay  deresindä suyun zeedelmesinnän. Kuraklık sebepindän bizdä birdän çoyu gidroȇlektrostenţiyalar işlerini durgudȇrlar. Başka taraftan da , bizdä petrol mallarınnan da problema var cenklär  beterinä İranda hen Kara denizdä. Bunun için çok  halklararası sebepleri büün var », — açıkladı Sandu Radio Moldova efirındä.

Ȇnergetika ministerlii açıkladı , ki petrol malların yoksuzluu birkaç stanţiyalarda baalı logistika soruşunnan hem ayırı dolaylarda onun büük sayıda satın almasınnan.

ȆNERGETİKA MİNİSTERLİİ

«Bir parça vakıda petrol malların etişmemesi gösterer milli uurunda onun defiţit durumunu. Bu taa çok te onnarda olȇr, kim  başka panayarlarından satın alȇr petrol mallarını. Çiftçilik uura deyni malların satın alması büük sayıda alınȇr . Büünkü günä defiţit bu uurda belli olmadı», —  haberleer ȇnergetika ministerlii.

Hükümet çizgeleer , ki işleyän petrol malların paasını kurmak mehanizması büün devlettä açık işleer.