Çadır-Lunga kasabasında geçirildi olay, angısı 1949-cu yılın orak ayın 5-dän 6-na geçä yarısı geçirilän deportaţiya olayın kurbannarına adandı. Anmak taşın yanına toplandılar yaşayannar, kuvet temsilcileri hem o insannar, angılarının ayleleri bu olaydan geçtilär.
Stalinizma hem deportaţiyalar kurbannarı günü MD ofiţial uurda 2016-ci yıldan beeri bakılȇr. Bu gün MD prezidentin kararınnan sıraya konuldu hem adanȇr deportaţiyaların en büük dalgasına, angısı orak ayın 5-dän 6-na karşı geçirildi. Çadırda bu gün kurbannara adandı moleben. Olaya katılannar anmak taşına çiçeklärlän geldilär.
Çiçekleri koymaktan sora olayı dolay administraţiya binasında ilerlettilär. Burada deportaţiyalara düşän insannarın yakındakıları aklına getirmeklerininnän paylaştılar. Onnar aylä zoorluklarını hem istoriyalarını açıkladılar.
Erli kuvet temsilcileri nışannadılar, ani o yılların olayları MD en çirkin istoriya olayları sayısında bulunȇrlar.
Ozamankı olayları aklımızda tutmak lääzım onun için, ani gençlär bilsinnär hem bölä olayların tekrarlanmasını barakmasınnar, nışannadı Kazayak küüyü muzey öndercisi Elena Terzi.
Represiyalara düşän vatandaşlar «Dooruluk» kurumun öndercisi Svetlana Kapanji nışannadı, ani 20 yıldan zeedä bu gün toplȇȇr deportaţiya kurbannarın senselelerini. Büün bu olaylar için gençlär dä bilsinnär lääzım-nışannadı Svetlana Kapanji.
Çadır-Lunga kasabasında geçirilän olay taa bir sıra çizgiledi istoriya olayların önemini, angısı boyları birleştirer.