Üüretim ministerlii Üüretim kodeksinä diişilmekleri teklif etti. Bu diişilmeklerin sayısında okulların reorganizaţiya proţesi var. Bu sayıda liţeylär hem gimnaziyalar, angılarında üürenicilerin sayısı küçük. Leţeylär neredä 0-cu, 11-ci, 12-ci klaslarda aaz üürenici var, liţey statusunu kaybedeceklär — gimnaziya olacȇklar. Gimnaziyalar, angılarında aaz uşak üürener — başlankı şkola ya uşak başçası olacȇklar. Devlet başka okullarda üürenmäk için hem işlemäk için maasuz koşulları kuracȇk. Yardımı kabledeceklär hem üürenicilerin ayleleri hem dä üüredicilär. Bu diişmeklerin maanası için “Dialog studiyada” programasında Gagauz Eri Üüretim bakanı N.Kristeva annattı.
Gagauz Erindä 45 okul var. 22 liţey hem 23 gimnaziya. En büük Komradın N.Tretyakov adına liţeyi hem Valkaneşin A.Doljnenko adına liţeyi sayılȇrlar. Burada üürenicilerin sayısı 1 binä yakın. En küçük okullar avtonomiyada Ferapontyevka hem Bucak küülerindä bulunȇrlar.
«Reorganizaţiya için maasuz kurallar belli edildilär. Eer liţeydä 10-cu, 11-ci, 12-ci klaslarda 30 üürenicidän aazsa, bu üüretim kurumuna gelän üürenmäk yılı için 10-cu klaslara üürenicileri kabul etmää izin verilmeer. Bu durumda Çöşmäküü liţeyi. Çok-Maydan küüyündä okul liţey sayılȇr, ama burada sadecä başlankı hem gimnaziya klasları var»,- N.Kristeva annattı.
Gimnaziyalar için dä özel kurallar var. Er 5-ci klastan 9-cu klasadan gimnaziyada 35 üürenicidän aaz varsa bu üüretim kurumu başlankı şkola statusunu kableder. Bu durumda, nicä çizgiledi N.Kristeva Ferapontyevka hem Bucak küülerin gimnaziyaları bulunȇrlar.
«Er okulda hepsi üürenicilerin sayısı 30 kişidän aazsa ona başlankı okul-uşak başçası statusu verilecek. Er uşakların sayısı 10 kişidän taa aazsa bu kurum uşak başçası statusunu kabledecek»,- N.Kristeva annattı.
Moldova devleti Üüretim kodeksinä busoy diişmeklär giriştirildiktän sora Üüretim ministerlii maasuz kararı kabledecek hem belli edecek, angı üüretim kurumnarında reorganizţiya proţesi geliştirilecek.
«Erindeki kuvetlär, Gagauziyada — Bakannık komiteti, Ministerliin kararına görä reorganizaţiya proţesi için kendi dokumentlerini kabletsin lääzım. Er bu karar erli uurda kabledilmärsä, sentäbrinin birindä bu üüretim kurumnarına bücettän paralar artık verilmeyeceklär»,- N.Kristeva annattı.
Nicä çizgiledi N.Kristeva, üürenicilär, angıları başka küülerin okullarına üürenmää geçmää zorunda olacȇklar, devlet bücetindän her ay 1000 ley kabledeceklär. Yardımı kabledeceklär bu okulların üürenicileri dä. Onnara eni okullarda iş bulacȇklar. Hep ölä onnara deyni yol parasını vereceklär. Er onnar başka küüyä yaşamaa geçmää kararı alarsalar devlet kiralık için para vermää çalışacȇk. Moldovada üürenicilerin sayısı yıl-yıldan iisiler. Butakım var nicä annamaa, ani reorganizaţiya gelän yılların süresindä taa çok üüretim kurumnarında olacȇk.