«Komrat Daa çorbacılıı» devlet kurumu oktäbrinin birindä kış için yakacak hazırlamaa başlayacȇk. Bu güz hem kış sezonunda çorbacılık lääzım 5 200 skladometra aaç kessin. Bu aaçları herbir isteyenin var hakı satın almaa. Bir skladometra yakacak kaça satılacȇk üürendi bizim korespondentimiz V.Çoban. 

«Komrat Daa çorbacılıı» devlet kurumu oktäbrinin birindä kış için yakacak hazırlamaa başlayacȇk. Bir skladometra   1 bin 150 leyä satılacȇk, açıkladı Komrat Daa çorbacılıı  başı  A.Peykov: «Bakıncasına başka yıllara çok isteyan  yok. Herbir insan, kim yakacak almaa isteer, Daa çorbacılıına danışsın lääzım. Uzmannar ona söleyeceklär, neredä yakacak var. Lääzım gelmää pasportlan, ödemää   parayı».

Aaçların taa zeedesi — salkım, var ak aacı hem kara aaç. O erlerdä, neredän bu güz aaçları keseceklär, ilkyazın genç fidan dikeceklär. “Komrat Daa çorbacılıı” devlet kurumu haberleer, ani hazır birkaç aya işä almaa kişileri. Onnarı üüredeceklär nicä aaçları kesmää hem daa içindä işlemää. Bundan kaarä bu işçilerin olacȇk kolaylıkları daal taa ucuz satın almaa, söledi A.Peykov: «Daalların bir skladometrası için 150-160 ley lääzım olacȇk ödemää».

Moldovanın yaşayannarı artık hazırlanȇrlar kış zamanına. Kim sä yakacaklan evlerini yısıdȇr, kim sä gazlan, var onnar da, kim alternativa yısıtmak kolaylıklarını kullanȇr. 

«Yakacaklan. Ama 1 skladometra şindi 1,5 bin mi, 1 700 mi ley. Pek paalı. Haliz bizä pensionerlerä deyni. Bir kış için 5-7 skladometra lääzım».

 «Güneş sıcaanı kullanȇrım».

 «Gazlan yısınȇrım. İki — üç bin ley ayda gider. Kvartira pek büük diil. Ayleyä deyni, neredä 1 uşak var bu diil pek çok, sayȇrım».

«Taa bişey hazırlamadık kiş için. yakacaklan yısınȇrız. Ama pek prost, ani paramız yok. Pensionerlerä pek zor. Bilmeeriz, nesoy kışlayacȇz».

«Komrat Daa çorbacılıı» devlet kurumu başı A.Peykov danışȇr vatandaşlara hem yalvarȇr, ki onnar yakacak sade devlet kurumnarından satın alssınnar. 

«Onnardan, kim kanona aykırı daalardan aaçları keser yakacal satın almaa olmaz. Bunun için büük ceza var. Hem yakacaksız kalacȇnız hem dä cezayı ödeyeceniz»,- A.Peykov danışȇr.

Peykov Aleksandr  haberledi, ani bu yılın süresindä kanona aykırı 150 kubometra aaç kesildi.