2026 icı yılın mart ayın bitkisindä Halklararası zamandaş oyunnar yarışmaları geçtilär, nereyä hip-hop oyunnarı da girdilär. United Cup çempionatında kolektivlär hem solistlär devletlerin türlü erlerindän pay aldılar. Nicä yarışmalara Komrattan genç hip-hop oyuncuları hazırlandılar hem oyunnarı gösterdilär.
Hip-hop studiyasının terbiedenneri Komradı hodulluklan temsil ettilär. Çempionatta 58 altın medali, 16 gümüş hem 15 bronza ödülünü kazandılar, profesional kategoriyasında 2 kubok kazandılar, paylaştı trener Andrey Lira: «Çempionata 82 uşak hem 50 ana gitti. Yarışmak üüsek uurda geçti. Biz ona 2 aydan zeedä aktiv hazırlandık. Bütün komandayı belli edeceydim, çünkü herkezi kendi zamanını, kuvedini harcadı. Bizdä KIDS 1 Pro kategoriyasında birinci».
Таisiya Tomaylı 3-cü eri «Мidl» kategoriyasında aldı hem «Beginers» kategoriyasında 1-ci.
Taisiya Tomaylı dedi: «Üç kategoriyada oynadım. Beginerts kategoriyasında birinci oldum hem 3-cü Мidl kategoriyasında. İi oynadım, ama taa ii vardı nicä olsun, pek yorulduydum sonuna kadar».
Аmeliya İlyeva «Pro» kategoriyasında – 1-ci eri aldı hem «Beginers» kategoriyasında 4-cü oldu.
Аmeliya İlyeva söledi: «Bän Beginers, Midl hem Pro kategoriyalarında oynadım. Pro – o en üüsek uur hip-hopta, onda 1-ci eri kazandım».
Darya Akbaş 2-ci erä «Debüt mini-kids» çıktı. Çempionat Daşanın oyunculuunda birinciydi.
Darya Akbaş annattı: «Tiraspoldä çempionatta Mini-Kids kategoriyasında yarıştım. Kuvedim vardı becerikliimi göstermää».
Komrattan oyuncuların başarlı yarışmaları taa bir kerä genç oyuncuların üüsek hazırlıını hem trenerin profesionnalıını gösterdi. İleridä kolektivi eni yarışmalar bekleerlär.
Аndrey Lira, hip-hop oyunnar treneri, ekledi: «Aprelin 25-dä Komratta neetliyiz kasabalar arası oyunnar yarışmalarını geçirmää, şindi onnara hazırlanȇrız. Ko oyuncular Komrada gelsinnär dä bizim oyuncuların uurunnan hem kasabamızlan tanışsınnar».
Kolektivdä yakın 130 uşaadan var. Hip-hop oyunnarı iki yıldan zeedä geliştirerlär.