Sport liţeyin terbiedenneri pay aldılar halklararası yarışmalarında da getirdilär Şveţiyadan üürenmäk kurumun kumbarasına 9 ödül, Komrat muniţipal sport okulun da güreşçileri kazandılar ilk, ikinci hem üçüncü erleri.
Tuşe, nakat, hem başka priyomları Komrat sport liţeyin üürenicileri kullandılar halklararası yarışmalarında, angıları geçtilär Şveţiyada. 11 sportçu kazandı 9 ödül, ikisi onnarda altın. Professional hazırlanmak, kaavi ruh hem harakter yardım ettilär sportçulara ensemää kendi konkurentlarını da kalkmaa şannı pyedestala. Nicä urguladılar çocuklar, konkurenţiya kaaviydi, güreşlär dä kızgındı.
«Zordu , ama geçirdim üç güreş».
«Şveţiyada geçti yarışmalar, geçirdim üç güreş, konkurentlär kaaviydi, taradım onnarı türlü priyomnarlan».
«Bän geçirdim üç güreş, ilk sopernik Komrattan, taradım onu sayılan 7-4, ikinci Şveţiya devletindän onu taradım sayılan 10-0».
«Yarışmalar geçtilär pek ii , üç güreş geçirdim».
Trener Nikolay Mavrodi urguladı, ani serbest güreşçilär üüsek uurda pay aldılar haklararası yarışmalarında, hep ölä geçirdilär 5 günnük sport sınışlarını, neredä üürendilär eni becermekleri.
«Yarışmalar geçtilär Şveţiyada Norçeping kasabasında. 9 ödül getirdik, iki altın, beş gümüş hem iki bronz. Altın getirdilär Pötr Komur hem Vladimir Kayräk»,- Nikolay Mavrodi urguladı.
Kazanılmış ödüllerdän sora uşaklar dinnenmeerlär, ama ilerlederlär sınışları matta. Trenerlar da yanında dorudȇrlar hem yardım ederlär taa üüsek uurda üürenmää eni elementleri. Uşakların becermeklerini esaba aldılar yortulu lineykada, angısı oldu adet gibi üürenmäk kurumunda. Sport liţeyın başın bir vakıda işini götürän Väçeslav Dragoy nışannadı, ani sportçuların taramaları — bu örnek herbir uşaa, kim burada üürener, neçinki sade hergünkü şınışlar hem disţiplina verer üüsek çıkışları.
«Bizim sportçular pay aldılar haklararası turnirdä, gösterdilär kendilerini üüsek uurda. Pek sevinerim, ani bizdä kızlar da bu yarışöalarda pay alȇrlar»,- Väçeslav Dragoy nışannadı
Yarışmalarda pay aldılar muniţipal sport okulun serbest güreşçileri, angıları kazandılar birinci eri, iki ikinci hem bir üçüncü. Çempion oldu Dmitriy Kösä. Nicä urguladı trener Evgeniy Nedälko, komanda gösterdi üüsek çıkışları hem kazandı eni becermekleri. Evgeniy Nedälko hep bu yarışmalarda kazandı ikinci eri. Yarışmalarda pay almak için harçları üstünä aldı Şveţiyada çeçen diasporası.