Komrat muniţipal nasaatın oturuşunda “Su-Kanal” çorbacılıınaa kasaba bücetindän 1 milion ley vermäk için karar kabledildi. Seslerini bu karar için 17 nasaatçı verdi. Oturuşta bütündän 22 nasaatçı pay aldı. Bu 1 milion leyi  “Su-Kanal” çorbacılıı ȇlektroȇnergiya için borçlarını ödemää deyni kullanacȇk. Borç toplandı o beterä, ani elektroȇnergiya için paalar büüdülär. Da suyun paayı kurumun hepsi harçlarını kapadamȇȇr. Hep ölä Ȇnergetika uurunda milli agentstvosu su için eni tarifi belli etti. Büün bir kub su için komratlılar 18 ley öderlär. 

Tatyana Slavioglo, “Su-Kanal” muniţipal çorbacılıı başı: «Biz harçlarımızı saydık. Da belli ettik, ani suyun bir kubu 42 ley olsun lääzm. Ȇnergetika uurunda milli agentstvosu belli etti, ani bu paa 31 ley kursun lääzım».

 Nasaatçılar sordular, var mı kolaylık bukadaradak üüseltmemää suyun paasını.  

«Bekim 25 ley? Etmeyecek mi? Ama 30 pek çok!»

 Su-Kanal muniţipal çorbacılıın başı T.Slavioglo çiziledi, ani ȇlektroȇnergiyanın paayı üüseldi, da bu kurumun işinä köstek koyȇr.

 Tatyana Slavioglo  Su-Kanal muniţipal çorbacılıı başı: «2023-cü yılda biz ȇlektroȇnergiyaya 3 milion 600 bin ley harcadık. Şindi sä bu uura 7,5 milion ley lääzım. Bän annȇȇrım, ani insannar sizä danışȇrlar da siz onnara yardım etmää savaşȇrsınız, ama bir büünkü durumu esaba alalım lääzım. Elektroȇnergiyanın paayı üüseldi. Kalan tariflär dä taa paalı oldular. İnsan ay paraları da üüseldilär». 

 Bu argumentlerdän sora nasaatçılar sordular su için tarif taa paalı olduktan sora kurum kendi borçlarından çıkabilecek mi, hepsi harçlarını enseyäbilecek mi? 

«Genä bizä para verelim deyni danışmayacȇnız mı?».

Cuvap busoydu.

 Tatyana Slavioglo Su-Kanal muniţipal çorbacılıı başı: «Bizdä her ay sadecä ȇlektroȇnergiya için 1 milion ley lääzım».

 «Önemni, ki para artsın».

Nicä belli oldu, suyun 42% kaybeler. 

 Tatyana Dudoglo nasaatçı :«Bu kayıpların sayısını iisiltmää deyni siz ne yapȇrsınız. Sapıdılan su için harçlar kimä ük gibi olacȇklar?».

 Tatyana Slavioglo Su-Kanal muniţipal çorbacılıı başı: «Su için eni paayı kurarkana kaybelän sular esaba alınmȇrlar.  Biz işimizi ilerlederiz. Yılda kaybelän suların sayısı 5 proţendä iisiler».

 T.Slavioglo söledi ani suyun 39 proţendi kaybeler o beterä, ani su verici sisteması eski. 

 «Trubalarımız pek eski».

 Bu durumu diiştirmää deyni ne yapılȇr, nasaatçı Vitaliy Vlah sordu: «Su kaliteli olsun deyni hem 7 gün aftada gecä gündüz olsun deyni ne yapılȇr. Biz istämeeriz, ki günün biri ȇlektroȇnergiya diil ödeli deyni bizä su verilmeyecek».  

Nasaatçı V.Anastasov çizgiledi, ani bu paaların üüselmesi komratta yaşayan ayleleri zor duruma koyacȇk. 

«Bän annȇȇrım, açan paalar 1, 2 üüselerlär. Ama bizdä onnar birdän 13,5 leyä üüselerlär. Bu pek çok. Aylelär, angıları ayda su için 500 ley ödeyärdilär, bundan ötää 1000, 900 ley ödeyeceklär. Sayȇrım, ani biz Ȇnergetika uurunda milli agentstvosunun kararını geri urmak için danışalım lääzım. Biz var nicä suyun paayın heryıl 1, 2, yada 3 leyä üüseldelim. Bän annȇȇrım, ani ȇlektroȇnergiya taa paalı oldu. Ama suyun paayını birdä 13 leyä üüseltmää olmaz»,- V.Anastasov çizgiledi.

 Ȇnergetika uurunda milli agentstvosu belli etti, ani komratta suyun paayı 31 ley olsun lääzım. Bu kararı nasaatçılar isteselär dä yok nasıl diiştirsinnär. 

«Biz yok nasıl bu durumu diiştirelim. Bizin yok hakımız. Ses vermemiz dä bişeyi diiştirmeyecek».

 İvan Panä nasaatçı: «Ȇnergetika uurunda milli agentstvosunun kararını geri urmaa kolaylıımız yok. Maasuz bu kurum devletimizdä  gazın, şafkın, petrol malların paalarını kurȇr».

 Suyun paayı Komratta 2022-ci yıldan beeri üüselmeer. Amma ȇlektroȇnergiyanın paayı üüseldi. Bu beterä borçlar toplanȇr. Nasaatçı V.Kara söledi netürlü bu durumu var nicä diiştirmää. 

Vladimir Kara nasaatçı: «Komradın öndercilii eşil ȇnergiyayı kullanmak için proektleri geliştirsin lääzım. Bu paraları arttırmaa kolaylıı verecek. Butakım “Su-Kanal”  çorbacılıı paralarını arttırabilecek».

 V.Kara çizgiledi, ani sadecä bu işlär yapıldıktan sora yakışacȇk Ȇnergetika uurunda milli agentstvosuna danışmaa da istemää ki suyun paayını iisiltsinnär. 

Bakmayarak ona ani deputatların ses vermesi suyun paayını diiştirmeyeck. Bu soruşu hep okadar bakmaya çıkardılar. 

Georgiy Vlah  Komrat muniţipal nasaatı başı nışannadı: «Biz sadecä kendi bakışımızı açıklȇȇrız».

Oturuşta 22 nasaatçı pay aldı. 8 nasaatçı kayıl oldular Ȇnergetika uurunda milli agentstvosunun kararınnan. 11 nasaatçı kendi seslerinnän belli ettilär, ani istämeerlär, si suyun paayı 18 leydän 31 leyä kadar üüselsin. 3 kişi ses vermäk proţesinä katılmadı.