Çok-Maydan küüyü F.Yanioglo adına liţeyindä multilingval üüretmäk programasının geliştirmesini genişlettilär. 2026–2027 üürenmäk yılın çeketmesindän beeri “Vatandaşlık terbietmesi” derslerindä sadecä rumın dilindä lafediler. Geçän yıllar sa dersin 70 proţendi rusça geçärdi, 30 proţendi sä — rumınca. Eni koşullar hem üüredicilär için hem dää üürenicilär için bir denemäk. Ama herbiri kuvedinä hem becermeklerinä emin. Üüredicilär, uşakların bilgi uurunu esaba alarak, zamandaş metodika yaklaşımnarını uydurȇrlar hem kullanȇrlar. Üürenicilär sä derslerdä taa dikkatlı sesleerlär. F.Yanioglo adına liţeyindä “Vatandaşlık terbietmesi” açık dersi geçti. Burada Üüretim ministerliin hem Üüretim bakannıın uzmannarı bulundular.
Geçän üürenmäk yıllarında Çok-Maydan küüyü F.Yanioglo adına liţeyindä multilingval üüretmäk programasına görä “Vatandaşlık terbietmesi” derslerindä taa çok rusça lafedärdilär. Şindi sä davaaları zorlaştırdılar. Derstä sadecä rumınca lafediler. Üüredici Ekaterina Arnaut üürenicilerin bilgi uurlarını kantarlayarak temayı açıklȇȇr hem sınışları kurȇr.
EKATERİNA ARNAUT
Çok-Maydan küüyü liţey üüredicisi
Açık derstä insannarın biri-birinä benzemesi hem biri-binindän ayırılması için laf gitti. Üürenicilär temayı açıklamak için türlü lafları hem lafbirleşmelerini kullandılar. Rumınca fikirlerini açıklamaa çalıştılar. Birkaç dildä serbest lafetmäk insana büük fayda getirer. Bunu uşaklar, artık pek islää annȇȇrlar.
Multilingval yaklaşımnarı iki daavayı birdän çözerlär. Uşaklar rumın dili hem literaturası derslerindä kabledilär bilgilerini, kaavilederlär hem dä “Vatandaşlık terbietmesi” derslerindä laf zebelliklerini zenginneştirerlär.
“Bän bu dersleri pek severim. Burada bilgilerimi genişlederim”.
Üüredicilär işleerlär birliktä. Aftada bir keret onnar toplanȇrlar da çıkışları yapȇrlar. Hem belli ederlär netürlü ötää dooru işleyeceklär. Angı temaları tekrarlamaa lääzım, nesoy lafları uşaklarlan üürenmää lääzım, ki laf zebellikleri genişlensin hem dä cümlä kurmak kolaylıkları kaavileşsin.
EKATERİNA ARNAUT
Çok-Maydan küüyü liţey üüredicisi
Herbir üürenicinin portfoliosu var. Burada belli olȇr netürlü ilerleer üürenici hem neredä zorlanȇr. Butakım üüredicilär annȇȇrlar nicä ötää dooru işlesinnär lääzım, ki üürenicilär bir uurda rumın dilini üürensinnär hem yaşlarına görä onu kullanabilsinnär hem derslerdä, yaparak sınışalrı hem cuvap ederäk üüredicinin soruşlarına hem dä hergünkü yaşamaklarında.
VALENTİNA ŞTİROY
Çok-Maydan küüyü liţey başı
“Multilingval kafedrasında birliktä rumın dili hem gagauz dili üüredicileri işleerlär. Onnar birliktä işlerini kurȇrlar. Biri-birinä nasaat vererlär. Bu nasaatları yazmak için maasuz dokumenti kurduk. Bu bir denemäk. Gelecektä ȇlektron variantına geçecez. Şindilik bunu kiyatta yapȇrız. Üüredicilär nasaatları gerçekleştirdiktän sora hep bu dokumenttä yazȇrlar, ani bu işi yaptılar. Kalan üüredicilär hepsi bu yazıları görerlär hem dä derslerin süresindä sonuçları esaba alȇrlar”.
NATALİYA KRİSTEVA
Üüretim bakanı
“Var neetimizdä multilingval resurs merkezlerini kurmaa. Çizgileerim, ani bu üüretim kurumu multilingval programasının beceriklii geliştirer. Bu uurda bu kolektiv cuvaplı. Üüredicilär kendi işlerini kaliteli yapȇrlar”.
Açık derstän sora çıkışlar yapıldılar. Uzmannar üüredicilerin becerikliini üüsek uurda notaladılar. Belli edildi, ani üürenicilerin lafetmesi için hem sınışları kendi başına yapmak için uygun koşullar kuruldular. Multilingval üüretmäk programasını önemni olmnası için Üüretim ministeriin temsilcisi İ.Duminika söledi.
İVAN DUMİNİKA
Üüretim ministerlii temsilcisi
“Bizim baş neetimiz rumın dilini üüretmäk için ugun koşulları kurmaa. Biz isteeriz, ki üürenicilerimiz devlet dilindä serbest lafedäbilsinnär”.
Gagauz Eri Üüretim bakannıı çizgileer, ani multilingval üüretmäk programasının ilerlemesi için büük kuvet koyulȇr. Onun baş neeti bir dildä serbest lafedän hem dolayında bulunan hepsi halklara saygı, hatır güdän uşakları terbi etmää.