GHT deputatları hem da MD Merkez Seçim Komissiyanın temsilcileri kaavileştirerlär dialogu çözmää deyni soruşu, angısı baalı seçimnärlän GHT. Bakılȇrlar soruşlar dooru hem acık seçimnerin geçirilmeleri için.  

«Обсуждаем вместе» programanın süresindä  Gagauziya Halk Topluşun öndercisinin bir vakıda işini götürän Nikolay Ormanji çizgiledi, ani Halk topluşuna seçimnär baamsız hem da demokratik lääzım olsunnar. O nışannadı, ani bunun için mutlaka lääzım konstruktiv dialogu hükümetin  institutların aralarında kurmaa. 

«Biz kararladık geçirmää bu annaşmakları, kabletmää deyni konsensusu, ki biz gidelim ileri. Da pek önemni geçirmää serbest, demokratik seçimnerini, yok edip hepsi negativ işlerini, angıları geçerlär seçimnär proţesindä.  Pek önemni, ki herbir kandidat, angısı uyȇr kanona görä hem da angısının var havezi, olmasınnar kösteklär o  kandidatlara»,- Nikolay Ormanji çizgiledi.

Moldova devletin Merkez Seçim Komissiyanın  başın yardımcısı Pavel Postikȇ nışannadı  dialogun hazırlıı için.  Onun laflarına görä,   bu yol kompromissa hem da zamandaş problemaların kararlamalarına, bakmadaan ona, ani kararlan var nasıl kayıl olmasınnar  proţesin hepsi pay alannarı. 

«Bän sayȇrım, ani açan biz açık olacez dialoga, açan bizim olacek neetimiz —  problemaların çözülmelerindä, ama diil başka problemaların peydalanmasında, ozaman bulacez kompromissi hem da kararları, angılarınnan hepsi kayıl olmayaceklar, neçinki bu kompromiss»,- Pavel Postikȇ nışannadı.

GHT deputatı Vladimir Kıssa çizgiledi, ani maassuz dialogun  hem da kompromislerin yardımnarınnan var nasıl etiştirmää geçirmää seçimneri GHT  bu yılın mayın bitkisindä. O nışannadı, ani barabar iş MD Merkez seçim Komisiyasınnan hem da Mekezin  kuvetlerinnän pek önemli seçimnär proţesin açıklıı için. 

«Yok nicä ölä olsun, ani hepsi hepsinnän kayıl olsunnar, neçinki bu kompromiss. Biz lääzım bulalım  bu kararı, ama onu var nasıl bulalım sade dialog formatında. Erli biz buluşarsaydık, da ararsaydık  problemaların çözülmelerini. Biz lääzım annayalım, ani 90 günü biz lääzım çıkaralım, neçinki seçimnär organı kurulȇr  90 gün kalınca, büün sa bizdä fevralin yarısı. Biz annȇȇrız, ani  bir aftanın içindä  biz var nasıl gelelim bir fikirä, da hepsi aylara görä, geçirelim mayın bitkisinädän seçimneri GHT»,- Vladimir Kıssa çizgiledi.

Getirecez aklılarınıza, ani seçimnär GHT, angıları için  taa ileri  haberlendi geçirmää bu yılın  Baba Marta ayın 22  — dä , geeri uruldular.