Moldova hükümeti kendi oturuşunda önemni kararları kabletti. Bakılan soruşların sayısında: insan haklarının koruması, ȇkonomikanın ilerlemesi, soţial uurunda tutturmak proektleri. Hep ölä hükümet azaları çiftçileri desteklemäk için maasuz kararı kabletti. Ministruların bu hem başka kararları için taa geniştän sıradakı süjetimizdä.
Hükümet belli etti netürlü işlär lääzım yapılsınnar er aşırı devletlerdäm Moldovaya gelän insannarın sayısı zeedelenecek. Maasuz dokumenttä yazılı, ani ön erdä insan hakları olsunnar lääzım. Ani Moldova vatandaşlarıт hem başka devletlerin temsilcileriт soţial uurunda hepsi izmetleri kabletmää hakları korunsunnar lääzım. Hep ölä aşırıdan gelennär gumanitar yardımını kabletsinnär lääzım. Hep ölä Hükümet particip.gov.md milli portalının konţepţiyasının hem iş sırasının kararladı. Eni sistemanın baş daavası işa adamnarının, sıradan vatandaşları hem kuvetleri bir erä getirip türlü izmetlerini kabletmesini kolaylaştıracȇk hem ayın-açık yapacȇk. Vatandaşları bi platformayı kullanarak türlü ministerliklerä, devlet kurumnarına kendi danışmaklarını veräbileceklär. Hem dä kendi özel kabinetlerini kullamarak göräbileceklär artık bakılȇr mı onnarın danışmakları hem nekadar tez karar kabledilecek, çizgiledi Hükümetin baş sekretari Aleksey Buzu: «Kuvetlär butakım taa cuvaplı olacȇklar. Hep ölä kabledilär kararlar da taa belli olacȇklar».
Moldova ministruları kendi oturuşlarında çiftçilärlän baalı soruşları da baktılar. Butakım 2025-ci yılda kuraklık beterinä zararı görän çiftçilerä yardım etmäk için karar kabledildi. Bütün sayı — 50 milion ley. Moldova devleti çiftţilik ministerliin başı Lüdmila Katlabuga çizgiledi, ani hükümet milli programayı kurȇr, angısının baş daavası çiftçilik sektorunun işini klimat diişilmeklerinä uydurmaa hem yapmaa ölä ki uygun olamayan havaların beterinä çiftçilär bereketi kaybetmesinnär hem para tarafından kayıpları olmasın.
«Bitkii vakıtlar vatandaşılarımız aşırıdan Moldovaya dönerlär, çiftçilik uurunda iş kendilerinä açȇrlar. Amma klimat diişilmeklerinin beterinä türlü zorluklaralan karşı gelerlär. Onnar bu zorlukları ensesinnär deyni biz yardımcı olmaa savaşȇrız. Hükümetin kararlar bir nışan — ani bu insannar yalnız diil, ani kuvetlär onnara yardımcı olmaa»,- Lüdmila Katlabuga çizgiledi.
Ayırı soruşlar Hükümetin oturuşunda soţila politikasınnan baalıydılar. Hükümet azaları Aylä festivalinin programasını kabletti. Festivalin orta yortusu Kişinövda Botanika başçasında mayın 16-da geçecek. Yortunun baş neeti ayleleri tutturmaa, uşaklara sevinmelik baaşlamaa, analara-bobalara, dädulara hem babulara hatır göstemää.