Sportçu Gagauziyadan Marianna Tihu kazandı üç ödül «Кубок Дуная» adaptiv sport halklararası turnirdä. Yarışmalar geçtilär Rumıniya devletindä Galaţ kasabasında. Temsiledip MD, Gagauziyayı o kazandı bir gümüş hem da iki bakır ödüllerini individual disţiplinalarda.
«Кубок Дуная» adaptiv sport yarışmalarda Galaţ kasabasında Marianna Tihu temsiletti Gagaguziyayı, Moldova Devletini kazanıp bir gümüş hem da iki bakır ödüllerini. Turnir topladı bireri yakın 110 kaavi sportçu Rumıniya hem Moldova devletlerindän, çizgiledi MariannaTihu.
«Bän katıldım yarışmaların may hepsi disţiplinalara. Priz erlerini uydu kazanma oktan patlamakta hem başka. Pay alıp bölä uurda yarışmalara, bän önümä koymȇrım kazanayım deyni nesoy sa eri. Bana deyni pek önemni — koyma hepsi kuvedimi, uztalıymı hem istememi gitmää deyni sade ileri, ki üüsek uurda temsiletmää Gagauziyayı, Moldova devletini. Bän pek sevinerim, ani bana uydu kazanma priz erlerin, ama devlet beyra kaldırıldı başışlamak ţeremoniyasında»,- Marianna Tihu nışannadı.
Marianna Tihu kazandı bir gümüş hem da iki bakır ödüllerini. Bu çıkışlar oldular onun çok vakıtlık zanatlanmasınnan adaptiv sportta, söleer Marianna. Kendi başarılarını o adȇr kendi uşakalrına, yakın insannarına hem da bütünnäGagauziyaya, angısı tutturdȇr onu büük spor yolunda.
«Açan çeketti başışlamak ţeremoniyası, da haberledilär enseycileri, ilk pyedestala teklifettillärTihu Mariannayı Gagauziyadan, Moldova devletindän. Beni o zaman pek duygular kapladılar. Bu ansızdan oldu. Açıktan soyleyım, düşünärdim, ani üçüncü eri kazanacam, am hiç bir zaman düşünmedim, ani ilk beni teklif edeceklär başışlamak için. Bu büük sevinmelik diil sade benim için, ama hepsi için, kimo beni tutturdu»,— Marianna Tihu nışannadı.
Marianna Tihu sayer, ani Gagauziyada mutlaka lääzım açılsın sport odası, zanatlanma deyni adaptiv sportlan. Onun bakışına görä, bölä zalın yapılması verecek kolaylık kolaylıksız insannara ilerletsinnär kendi becermeklerini, zanatlansınnar sportlan, hep ölä pay alsınnar sport yarışmalarında üüsek uurda.
«Bän diil bir sıra söyledim, açma deyni bölä zal — diil sade onun için, ki kolaylıksız insannar pay alsınnar yrışmalarda hem kazansınnar priz erlerini, ama onun için da, ki onnarın olsun erleri, neredä onnar toplanacaklar lafetmää, zanaatlanma hem da vakışdı geçirmää. Zamandaş çoyu insannar, angıları bulunȇrlar bölä durumda, istämäz kalȇrlar evdä dört duva arasında. Pek önemni yapmaa deyni hepsi lääzımnı koşuları, angılarına görä onnar çikabileceklär evdän, ilerleeceklär hem da duyaceklar kendilerini cümnenin bir payı gibi»,- Marianna Tihu nışannadı.
«Кубок Дуная» adaptiv sport yarışmalarını tutturdu Gagauziya gençlik hem sport bakannı. Marianna şindän sora çok yılların süresindä temsil eder MD hem Gagauziyayı dünä arenasında üüsek uurda türlü sport yarışmalarında.