Beşalma küüyündä geçti «Mȇrţişor Gagauziyada -2026» festivalı .Olayda pay aldılar avtonomiyanın anılmış kolektivleri.
Regional festivali «Mȇrţişor Gagauziyada -2026» geçti mart ayın 10-da Beşalmada. Bu olay geçiriler avtonomiyada 2018 yıldan beeri,da 8 keret birleştirdi yaşayannarı kultura adetlerin dolayında.Sţenada talantlarını gösterdilär artistlär hem kollektivlär, nışannadı Kultura bakanı Marina Semönova: «Saa olsun hepsina. İsteerim adamaa hepsinä saalık, ko hepsi şen olsunnar».
On günün içindä bütün avtonomiyada geçtilär türlü yortulu konţertlar,kultura olayları, tombarlak masalar hem sergilär,adalı ilkyaz yortusuna – Mȇrţişora.Gözäl yortuylan yaşayannarı kutladı Beşalmaa küüyün başı Valeriy Moş: «Bizdä bölä büük yortu geçiriler, şansora 15 yıl çalışȇrım,ama seftä bölä olay Beşalmada geçer. Bizim için bu hoşlu, kabletmää musaafirleri Kultura evimizdä. Geçiriler yortu bizim dostlarımızın, Kultura bakannıın yardımınnan».
Olayın önemlisini urguladı GHT deputatı Grigoriy Dülger: «Pek hoşlu,ani bölä büük yortu geçiriler bizdä küüdä,da bän sayȇrım,ani olacek ii yortu.Şükürlük Kultura bakannıına,ani bizim küüyü ayırdılar,artistlär,ani bizdä bölä gözäl ilkyaz yortusunu hazırladılar. Hepsinä gözäl kef, ko canda olsun herzaman ilkyaz hem getirsin iilik hem usluluk».
Başarıldı festival Mȇrţişorun geçirilmesi Valkaneş kasabasının Kultura evinä,bu oldu yortulu estapetanın payı.