Tradiţional gagauz kıırmanın dadını hem kokusunu düzär saklılıklarını Svetlana Dimitroglo üürendi.
Lübov Kapaklı büüdü çok uşaklı Beşalma aylesindä — hepsi altı can. Evladlarını büütmäk için onun anaylan bobası evdä kuş, hayvan tutarmıştılar. Süt masulundan imek hepbir varmıştı, söleer Lübov Kapaklı: «Bizdä evdä vardı inek. Biz kalabalıktık, altı uşaktık, sekiz candık – boba hem mamu. Mamu aftada iki kerä yapardı kıırma, ani doyurmaa deyni. Bir fırın bir kerettä gidärdi».
Gagauz millet imesi Kıırma-gagauzların tradiţional kufnesinin sevgili imeklerin birisi. O hamur pişirmesi sade diil, o haliz ev sıcaklık, musaafircilik hem zengin kultura tradiţiyası.
«Kıırma gagauzlarda pek geçer. O naţionalnoe blüdo-kıırma. Sıralarda: bir rojdeniya, bir masa mı, vatizlik mi, steonuzluk mu kıırma masayı düzer hem insan onu pek beener»,- dedi Lübov Kapaklı.
Lüba bulü pişirmeklerdä sade ev süt masulluunu kullanȇr. Buundan kaarı o kıırmayı fırında pişirer, kıırmanın dä özel dadını düzän saklılıklarınnan paylaştı.
«Te bu tenekidä kıırmanın dadı başka olacek. Kenarcıkları bortçaaz olacek da kaymak girmeer altına. Koyȇrım, nicä anamdan gördüm domuz yaayını. Onun dadı gevrek olȇr. Saa yaayına bakınca, taa islää olȇr. Ki iyämeer, koysun saa yaayı. Bu dad unudulmȇȇr. Te nekadar savaş yamaa kendin, mamunun imesi genä başka»,- söledi karı.
Lüba bulü söleer, ani ona deyni en büük örnek yaşamakta herbir iştä anasıydı.
«İlk anam. Benin anam becerikliydi. Mamum pek gözäl işlär yapardı. Onun imeklerini dadını hep taa unudamȇȇrım. Mamu verer örnek uşaklara, mamu verer»,- nışannadı Lübov.
En datlı imeklär analardan kızlarına geçerlär. Lüba bulünun var iki kızı, ikisi dä anasından aşçılık bilgilerini çektilär. Onnar da kendi aylelerinä gagauz milet imeklerini hazırlȇȇrlar.