Gaydar küüyün dört evin yaşayannarı kötü durumda bulunan yol beterinä zorluk çekerlär. Yol, angısının uzunnuu kurȇr 800 metra geçer Lunguţa derenin kenarında. Bu derenin paklamasından sora yol bozuldu.
Gaydar küüyündä yol, angısı geçer Novaya sokaandan yaşamak erin merkezinä yapıldı 1982 yılda. Onu korudular yaşayannar kendileri — kendi kuvetlerinnän, kendi paralarınnan. İlktän o bir daracek pıtıkaydı. Geçincän vakıt o genişlendi, da ondan vardı nasıl geçsinnär maşınalar evlerä, hızlı medik yardım maşınası hem da yangın bölümün maşınası. Büünkü günnär sa yolda çamur hem maşınalardan derin izleri.
Mariya Burduja Gaydar küüyü yaşayanı: «Biz kendi evlerimizi yaptık kendilerimiz, kocalarımızlan. Dört ev orada, onnar kendi ellerinnän hepsini yaptılar, yolu yaptılar, olsun geçmää deyni. Biz yalvarȇrız işitsinnär bizi, bizi görsünnär. Biz yok nasıl çıkalım buradan».
Olga Bejenar Gaydar küüyü yaşayanı: « Biz diiliz kayıl kapasınnar bu yolu, da braksınnar sade bir pıtıkayı. Orada var iki metralık yol. Çaarȇrız hızlı medik yardımın maşınasını — yok neredän. Sade bizim bu yolumuz».
Problema ilktän belliydi, nicä yolun bozulması, paklanarkana Lunguţa deresini. Yok var nasıl sölemää, ani bütündän bozuktu. Yamurlardan sora, yoktu nasıl geçmää. Erli kuvetlär kayıl problemaylan. Küyün primarı İlya Kiosä nışannadı, ani bu görünmäzdi durum, angısı oldu düzmäk işlerin süresindä.
«Primariya iki sıra döşedi şebönka taşlarını, biraz düzdük, onnar oradan geçärdilär. Şindi sa işleri yaparkana. Elbetki bozulȇr. O genişlik tarafından ölä dä kalȇr, ama lääzım olacek şebönka taşlarını koymaa. Deecez, ani nasaatçılardan lääzım olacek geçirmää lääzımnı parayı, yol burada kalsın»,- İlya Kiosä nışannadı.
Proekttä alınmadılar esaba kimi momentlär. Düzmäk — montaj işlerin öndercisi İvan Arabadji bununnan kayıl: «Esaba alınmadı köprü saф bayırın tarafından. Orada, küüyüdä, yapacez proektä korrektirovka».
Bu evlerin yaşayannarı kendibaşlarına bu peydalanmış problemayı çözämeyeceklär. Kuvet hem da para yapmaa deyni yolu insanda yok. Onnar umutlanȇrlar, ani olacek yardım erli kuvetlerin tarafından.
«Bekim olacek. Biz şindän sora kendi kuvbetlerimizlän enseyämecez. 1800 ley pensiya parası- ne bän var nasıl yapayım, adamım yok».
«Olsun deyni diil azdan, ama iştä. Erli kalarsaydı yol, erli kalarsaydı köprü, bizä şindän sora islä».
Küüyün primarı İlya Kiosä söleer, ani yolu koruyaceklar, ama bunun için lääzım nasatçıların kararı hem da taa paralar.
«Başka iş — onu lääzım döşemää şebönkaylan. Buna lääzım nasaatçıları kararı, — yol fondundan yada aramaa başka erlerdän paraları, ki bu yolu yapmaa deyni. Neçinki orada var insan, dört ev»,- İlya Kiosä söleer.
Kuvetlär adȇrlar — yol yapılacek. Primarın laflarına görä, Lunguţa derenin kazılmasını hem paklanmasını plannanȇr başarmaa bu yılın mayın bitkisinädän.