Komrat kasabanın Kulrura evindä çeketti hazırlanmaklar şen hem meraklı konkursa deyni «Hadi, kızlar!», angısı geçecek mardın 28-dä. Pay alannar lääzım olaceklar göstürsünnär kendi talantlarını, akıllıını hem çemrekliini türlü konkurslarda.
Konkurs yapılȇr, ki kurmaa yortulu atmosferayı hem gençlerin aktivliini tutturmaa deyni, açıkladı kultura evin başı Marina Manjul. Pay alannara lääzım olacek geçmää birkaç denemekleri: yaradıcılık , intelektual hem başka şen konkurslarda.
«Biz bildirdik konkurs için, yaptık kuralları, angılarında olacek nominaţiyalar, angılarına görä pay alannar lääzım olaceklar göstersinnär kendilerini nicä saabiyka , yaradacılıyka, dizayner hem nicä bloger da. Biz yaşȇȇrız zamandaş vakıtta , onuştan onnar annadaceklar kendi için, nicä blogerlar, çekettireräk konkursu bir meraklı, kreativ videosüjetlan»,- açıkladı kultura evin başı Marina Manjul.
Programmada hem sţenada olacek yaradacılık, meraklı görevlär hem yortulu atmosfera da. Belä olaylar yardım ederlär kızların becermeklerini açmaa hem üüsek uurda kef siiredicilerä baaşlamaa, esap aldı kultura evin başı.
«Isteerim taa demää, ki bizim kızlar için kuruldu yannış bir fikir, ani onnar telefonda oturmaktan kaarä bişey becermeerlär. Ama o diil ölä, onnar becererlär çok işlär, onuştan göstereceklär kendilerini»,- açıkladı kultura evin başı Marina Manjul.
Bekleniler, ani olay meraklı geçecek hem herbir yaşta insannarı bir erä toplayabilecek.
«Söleyecäm, ani bu formatta bu yarışmak seftä geçirilecek. Şükür Allaha, ani ona katılmaa isteerlär. Düşünerim, ani o islää geçecek. Biz ilerdän bu formatta yarışmakları televizorda siiredärdik. Unudulmuş işlär geeri dönerlär, ama biz onnarı biraz taa donadȇrız, taa zamandaş yapȇrız. Düşünerim, ani siiredicilerä meraklı olacek. Neetleneriz taa büük yaşta insannarı da çekmää bu yarışmaya»,- açıkladı kultura evin başı Marina Manjul.
Yarışmanın kurucuları nışannȇȇrlar, ani pay alannar baaşışları kabledeceklär. Yarışmaya katılmaa birkaç genç kız şansora isteer. Marina Manjul nışannadı, ani gün-gündän taa çoyu pay almaa isteerlär.
«Burada olacek çok nominaţiya. Herbir nominaţiyada kendi notaları olaceklar. İsteeriz, ani herbir pay alan gözäl olsun. Herbirinä verileceklär diplomnar hem baaşışlar. Ya para gibi, yada nesoysa baaşış onnara alacez. Büünkü gündä 8 kişi katlmaa isteerlär. Vakıt azalȇr, amma büün taa bir kişi daşışmaa istedi»,- Marina Manjul nışannadı.
Yarışmanın kurucuları nışannadılar, ani bölä olaylar sıcak adet gibi lääzım olsunnar. Yarışmak Komrat kasabası Kultura evindä mart ayın 28-dä saat 4-tä geçirilecek.