Fevralin 15-dä Komratta geçtilär anmak olayları adalı Afganistandan askerlerin çıkarılmasından yıldönümünä.Akţiyada pay aldılar veterannar,avtonomiyanın hem muniţipal önderciliin hem cümnä kurumnarın temsilcileri.
Ofiţial haberlerä görä, Afgan cengindä pay aldı avtonomiyanın yakın 700 yaşayanı, evä dönmedilär 12 onnardan. Nicä nışannadı Afgan cengin veterannarın birliin başı Pötr Mavrodi, avtonomiyada korunȇr anmak o cengin askercileri için.Onun laflarına görä, her yıl geçirilerlär olaylar,adalı geçinmiş afgan-askercilerin anmasına,da bu adet illerleyecek gelecektä dä.
«Bizdä her yıl geçiriler çok türlü olay,adalı anmaa deyni askercileri.Bu günnerdä geçirdik Komrat dolayın başın yardımınnan büük klassların üürenicileri için heryılkı voleybol turnirini. Bizdä bu yılda plana koyulu geçirmää her ay olayları.Onnar geçerlär üüretim merkezlerdä,angıları taşȇrlar afgan askercilerin adlarını»,- nışannadı Afgan cengin veterannarın birliin başı Pötr Mavrodi.
Komrat kasabasının primarı S.Anastasov urguladı,ani o yılların belalı olayları iliştilär onun aylesinä dä, hem ani istoriya anması lääzım korunsun.
«37 yıl –şansora çok geçti o zamandan beeri,nicä bizim vatandaşları çaarardılar izmetä,benim da kardaşım izmet etti Afganistanda.Tutȇrım ii aklımda ananın yaşlarını hem dualarını,dönsün geeri diri.Bu vakıtlar zordular hepsi için.Hepsizim izmet edärdik,ama diil nicä Afganistanda,orada başka izmetti.Hepsinä dilemää isteerim usluluk,iilik, kısmet, duymayalım başka bölä vakıtları, uşaklarımız için olsun raatlık hem iilik»,- S.Anastasov urguladı.
Komrat kasabasının muniţipal nasaatın başı Georgiy Vlah kendi sözündä urguladı,ani afgan cengin hepsi pay alannarını anmaa lääzım hem düşünmää o aar denemeklär için,ani düştülär onnara ozaman.
«Biz toplandık burayı, anmaa deyni hem saygıyı göstermää onnara,kim diil laflan ama işlän cenk etti o erlerdä.Çıktılar orayı diil şannık için,ama yapmaa deyni asker borcunu eminä görä»,- Georgiy Vlah urguladı.
Asker din izmetçisi Väçeslav Hortolomey, danışarak toplanmış olaya insannara,urguladı anmanın ruh aspektini.
«Asker din izmetçiliin tarafından, isteerim sölemää,ani bişey olmazlaa görä olmȇȇr, hepsinä Allahın voiası var. Hepsi uygun,gözäl, aarif kurulu.Bizä sade dikatlık etişmeer, saburluk, dayanıklı geçirmää deyni, kabletmää hem almaa beceriklää»,- Väçeslav Hortolomey urguladı.
Anmak olayları getirderlär aklıya usluluun paası için hem lääzımnık için korumaa aklımızda o insannarı,angıları o zamanda kendi asker izmetini getirdiydi.