Kırbaalı küüyündä 50 yıldan zeedä klisä yok. Nezamansa burada klisä varmış, ama büünkü gündä yaşayannar duvalarını komuşu küüyün klisesindä geçirerlär hem umutlan bekleerlär, nezaman küüydä eni klisä düzülmesi başarılacek.
Birkaç yıl geeri Kırbaalı küüyündä eni klisä binasını düzmää başladılar. Belli edildi klisenin eri hem proekti, kaldırıldılar duvarlar, ama bu uurda onun düzüntücülük işleri durguduldular. Büün başarılmadık klisä duvarları küüyün merkezindä yaşayannarı umut simvolu gibi durȇrlar, nışannȇȇr küüyü başı Tatyana Kiosä: «Bizim küüydä varmış pek büük hem gözäl klisä, 50-ci yıllarda onu daatmışlar, erlän bir yapmışlar. İhtiarlar annadȇrlar, ani olaydı nereyi gitmää, onnar geleceydilär kliseyä. Büün klisä yannaşık küüydä var, ama bizdä transport probleması var».
Bakmayarak, ani klisä yarım durȇr, büük pravoslav yortularında burada slujbalar geçirilerlär. Bölä günnerdä yarım duran klisä duvarları buraya toplanan yaşayannarın duvalarınınnan aydınnadılȇrlar. Bu verer kolaylık yaşayannara din hem kultura kendiliini korumaa, nışannadı primar.
«Batüşka dedi bişeylän örtelim onun üstünü da burada slujbaları geçirelim, olacek nicä klisä esabı diil ani sadece duvarları var»,- nışannadı primar.
Büünkü gündä Kırbaalılar komuşu küüyün klisesinä duvaya giderlär. Yaşlı insannara deyni hem küçük uşaklarlan aylelerä deyni bu pek uygun diil, çünkü herzaman transport Budȇyä gitmää deyni bulmaa zor. Bakmayarak buna ama, insannarın inanı hem umudu yardım ederlär onnara bu işi istedii günnerdä gerçeklemää.
Evdokiya Dermenji, Kırbaalı küüyü yaşayanı: «Bizim klisä 2012-ci yılda düzülmää başladı, ama duvarlar kaldırıldılar da iş ilerlämeer. Bizim insannar pek inanȇrlar, onuştan komuşu küüyä Budȇyä giderlär. Pazarlar günnerindä benin adamım bizi götüter orayı. Var ölä yaşayannar, angıları isteerlär kliseyä gitmää, ama kolaylıkları yok».
Küüyün primarı Tatyana Kiosä nışannȇȇr, ani erli kuvetlerä deyni klisenin düzülmesi başarılması soruşu açık kalȇr. Onun laflarına görä yaşayannar umutlanȇrlar, ani kısa zamanda küüyün klisesi düzülmesi başa çıkacek da Kırbaalının kendi klisesi olacek, angısı diil sade duva eri olacek, ama bütün küüyün ruh birleşmesi eri gibi olacek. Büün ama küüyün merkezindä yarım duran klisä duvarları herbirinä Kırbaalıda Allaha inanın var olmasını göstererlär hem ani bununnan bilä yaşȇȇr inan, ani nezamansa küüydä enidän çan sesi ötmää başlayacek.