Komratta çekettilär kasabayı paklamaa, tertiplemää hem eşilletmää. Akţiya geçer mart ayın onundan may ayın 8-zinädän. O doorudulu yapmaa  kasabayı taa ii hem kurmaa taa pak hem uygun koşulları hepsi yaşayannar için.

İniţiativa kasaba teritoriyasının tertiplemesindä birleştirecek erindeki kuvetlerin, komunal izmetlerin hem yaşayannarın  zaametlerini,  nışannadı primar yardımcısı Viktor Baldji. Ayırı er veriler dinnenmäk zonalarına, neredä her gün vakıdı geçirerlär aylelär uşaklarlan hem yaşlı insannar. Baş neet- diil sade tertiplemää kasabayı, ama kurmaa yaşayannarda cuvaplıı. Pak hem tertipli kasaba- o barabar çıkış, herbir insanın zaameti, nışannadı  Komrat kasaba primar yardımcısı Viktor Baldji: «Herkeret danışȇrız hem yalvarȇrız yaşayannarı/ ki onnar kendi  evlertin önündä çok katlı evlerin aullar içini tertiplesinnär kıştan sora. Biz annёёrız, ani çok gübür toplandı- herersi iiridi, neredäsä fidan dikmää lääzım, neredäsä toprak getirmää, neredäsä paklamaa. Biz nicä primariya kendi tarafımızdan alȇrız fidancıkları da insana vereriz.»

 Komunal izmetlär hem Su kanal çorbacılıı paklȇȇrlar yolları, troturaları, başçaları, parkları, çıkarȇrlar gübürleri hem kasaba mezarlardan da, haberledi Viktor Baldji: «Herbir mezarlıktan insan kendisi toplȇȇr hem gübürleri çıkarȇr, ama komunal izmeti onnarı sora çıkarȇr nicä eski ölä eni mezarlıktan da».

 Komratlılar şasora çekettilär tertiplermää kendi evlerini hem dolayında erleri, hem da kendi hısımnarın mezarlıklarını kasabanın mezarında.

«Bu en ilkin bizä lääzım. Lääzım aklımızda tutalım yakınnarı hem da bu adet kıştan sora mezarlıkları tertiplemää. Bizdä var bir problema da o suylan baalı. İsteeriz esaba bunu alsınnar. Genä, açan gelecez, getirecez su da yıkacez herersini burada, ama şindi sade otları keseriz. Yılda üç dört keret geleriz. Elbetki varsa vakıt geleriz, bakȇrız. Bu yıl ilk keret geldik. Şansora vakıdı da, geleriz görmää ne olȇr.»

 Paklamak, eşilletmäk  hem tertiplemäk akţiyası yardım edecek Komrat olsun taa uygun hem yakışıklı, söleerlär yaşayannar hem  musaafirlär.

« Bizdä evdä insan  paklȇȇr kendi aulun içini. Onnar paklıkta yaşamaa isteerlär. Bu ölä olsun lääzım. Zorlan diil lääzım olsun, insan lääzım istesin, neçinki onnarda türlü vakıt, türlü plannar. İnsan lääzım istesin kimdä vakıt var. » 

«Bu pek islää, açan insan paklıkta yaşamaa isteer hem yardım eder tertiplemektä. Bän kayılım, açan bendä serbest zaman var cumertesi Pazar günündä. Zorlan koymasınnar. Sayȇrım, ani bu islää.»

 «Herbir yaşayan punktunda nicä da Komratta bunu lääzım yapmaa , neçinki paklamarsaydık herersi kirli olacek. Bu lääzım hepsi vatandaşları meraklandırsın. Bän primariyada işleerim- biz yardım ederiz da tertipleeriz kultura evin hem primariyanın yanında hem kendi evlerin dolayından.»

«Pek önemni paklamaa kasabımızı sokakları aul içindä hem hererdä. Hepsi lääzımnı. Bunu kendi evindä aul içindä yapmaa lääzım. Kendimdä yaperım ama çıkmaa kolektiv içinä yapayamacam.»

 «Bän kayılım bölä akţiyaların geçirmesinnän. Katılardım taa şkoladan hem student olarak. Çıkacam tertiplemeya. İlkin evin dolayında kireçlecäm hem fidannarı hem bordürları. Kasaba oldu taa pak.»

«Katılȇrız da çekederiz kendi aulumuzdan, harmandan hem evdän. Aylelärlän barabar herersini paklȇȇriz kasabamız pak olsun. »

 İnsanın yardımınnan biz kasabamızı yapacez taa pak, taa gözäl hem musaafirci, urguladı primar yardımcısı Viktor Baldji: « Biz şükür olacez eer hepsi vatandaşlar bu işä katılaceklar. Biz savaşȇrız ki bu işä hepsi yaşayannar katılsınnar. Yapȇrız ölä, ki kasabamız taa pak olsun. Eer herbir ev, ekonomik agenti koyacek zaametini, ozaman kasabamızı taa pak yapacez».

Erindeki kuvetlär umut ederlär, ani eşilletmäk akţiyası olacek ii adet gibi da yardım edecek ileriya dooru kasaba infrastrukturası ilerlesin hem yaşamak uurun kalitesi taa üüsää kalksın.