Karıların yortusuna kaarşı Kazayak küüyün liţeyindä «Karı logikası» intelektual oyunu geçti. Yortulu atmosfera, şen gülüşlär hem komanda ruhu birleştirdi okulda birkaç evlad boylarını. 

Oyun masalarında — analar, babular, üüredicilär, kızlar liţey klaslardan hem da musaafirlär Kıpçak küüyündän . Pay alannar cuvap ettilär türlü meraklı soruşlara, gösterdilär kendi fikirlerini hem logikasını. 

Ayırı hem özel bu yortunun sınırlarında oldu  barabar çalışmak için annaşmanın imzalaması Kazayak küüyün liţeyin hem Kıpçak küüyün iki liţeylerinnän. Bölä isteişlän danıştı üüredicilerin aktivı. Bu intelektual oyunu için hem barabar çalışmak için liteylerin arasĩnda söledi Kazayak küüyün liţey başı Diana Fazlı: «Biz bu gündä kaarşılêêrız musaafirleri — anaları, malileri, bizim liţeyin kızları , bizim üüredicilär da pay alêrlar bu yortuda. Bu olayı hep ölä da biz baaladık bir önemni proektlän EduDost — üürenicilerin teklifinä görä, biz imzalêrız annaşmayı barabar çalışmak için da kaaviledecez bizim ilişkileri».

Okulların arasında barabar çalışmak uşaklara deyni açêr eni kolaylıkları — barabar proektlär hem dostluk buluşmaklar. Nekadar önemni bu adım Kıpçak küüyün liţeyi için söledi Boris Yanakoglunun adına liţeyin başı Natalia Uzun: «Bizim uşaklar bekledilär bu buluşmayı, sevineriz ,ani biz, direktorlar barabar çalışêrız, annaşêrız. Büünkü olay verecek kolaylık taa üüsek uura çıkarmaa baalantıları, da umutlanêrız, ani gelän buluşmak bizim liţeyimizdä geçecek».

Olayın baş kahramannarı — elbetki pay alannar oldular, kızlar, karılar, üüredicilär. Onnar Kendi duyguları için annattılar.

«Sanerım, ani oyunnar yapıldı çok ii taraftan, çünkü biz var nicä bulalım kendimizä arkadaş, var nicä logikaya dooru lafedelim, aarayalım dooru cuvapları»

«Bän pek beendim bu oyunu, bana göründü o pek meraklı, bän beenerim bölä oynamaa».

«Meraklı, elbetki, faydalı, neçin ki biz genişlederiz bizim bilgilerimizi».

«Karı logikası» intelektual oyunu taa bir keret topladı birliktä türlü yaşta pay alannarı hem verdi kolaylık kurmaa taa kaavi baalantıları üürenicilerin arasında.