Komratta bakılȇr avtomatik kameraların koymasında proekti,angısı sayıya koyȇr yol kuralların bozulmaklarını.Laf gider regional  trassalar için.İniţiativa muniţipal nasaatta dartışmaklara getirdi. Nasaatçıların payı  sayȇrlar,ani lääzım koymaa girişlerdä hem çıkışlarda kasabadan kameraları, neredä en sık sıra belli olȇr hızlılıın büültmesi.

Komrat muniţipiyanın primarı  Sergey Anastasov urguladı,ani kameraların koyması plannanılȇr respublikan yollarda,da bu uurda erindeki kuvetledä yok kolaylıkları kabletmää kararları bu erlerdä.

Sergey Anastasov, Komrat muniţipiyanın primarı, dedi: «Toprak eri –bu diil bizim vaarlıımız,bu respublikan yolu, bizä ilişmer. Biz var nicä kararlayalım vermää osaydı vermemää, sade bizim yollarda. Biz burada ayıramȇrız, neçinki aalemin vaarlıı. Kirsovda nasıl oldu,koyuldu kameralar küüyun çeketmesindä hem bitkisindä, primara  kimsey sormadı».

 Muniţipal nasaatçısı Valeriy Kıssa urguladı,ani dikatlıksızlıın beterinä insanda herzaman ştraflar var nicä olsunnar.

«Kasabada 30-40 gezeerim,o beterä,ani maşina çok var.Yok nicä hızlı gitmää,da olaceklar ştraflar kayış yada telefon için»,- Valeriy Kıssa urguladı.

Yaşayannar paylaştılar fikirlerinnän yollarda kameraların koyması için.

«Bän buna ii bakȇrım, çoyu hızlı gezerlär da lääzım bişey yapılsın.Geçerim eşil şafkta,ama önündä yada ardında var nicä maşina geçsin.Sayȇrım,ani maşinayı götürärkenä, olmaz telefonu kullanmaa, bundan korku altına çoyu düşer».

«Da,bän görärdim,ani çoyu yol kurallarını bozȇrlar, ama dikat savaşȇrım olmaa, kolvererim hepsi maşinaları da ölä aykırlȇrım yolu».

«Bän sayȇrım,ani lääzım koyulsunnar kameralar,gözletmek olsun deyni, neçinki çok kural bozulması var».

«Şindi daa zor oldu, çok kural bozulması,lääzım herzmaan olmaa hazır türlü olaylara. Bundan taa i var nicä olsun,ama var te onnar,ani bozȇrlar, te onnara da lääzım kameralar».

Muniţipal oturuşun zamanında nasaatçıların çoyu tutturmadılar bu proekti.Bununnan barabar, Sergey Anastasovun laflarına görä, proektä görä, baalı respublikan yollarlan, alınmarsa kanona görä ofiţial karar,o var nicä sayılsın kayıllı alarak hesaba Moldovanın kanonnarını.