Gagauziyaya hep taa gelerlär gumanitar yardımnarı Türkiye devletindän. Bu sıra yaşayannara verilerlär medik hem reabilitaţiya tertipleri.

Gagauziya  Askalallar birlii, Saalık bakannıı soţial izmetçileri  hem Parlament eks-deputatı Ivanna  Köksal hazırladılar listeleri, neredä belli ettilär kimä maasuz lääzım yardım. Türkiye devletin kardaş belediyelerinnän barabar çalışmaktan sora oldu kolaylık medik tertiplerini regiona getirmää. Çok yıl sıravardır bölä gumanitar kolaylıı olêr «Ajutor oamenilor» diil hükümet kurumun yardımınnan, angısı savaşêr fayda getirmää o insannara, kimä lääzım taa çok dikkatlık saalık tarafından. Kazayak küüyündä yaşayannar kablettilär bastonnarı, elektrik hem mehanik koläskaları, gigiena tertiplerini. Bu yardım verdi kolaylık kendilerimizi taa serbest duymaa, dedilär yaşayannar.

«Lääzımnı,biz bunsuz yok nicä gezelim, ayaklarımız tutmȇȇr gezmää. Bän pek sevinerim, ani verersizin bunnarı, bastonnarı, ne var, gezmää deyni  kolaylık olsun insannarda».

«Bana da hodulä. Bana da islää, ama sopaylan gezämeerim, dizlerim folanık вырежи меня — Saa olsunnar, saalıkları olsun hepsinin, taa getirsinnär kimä lääzım».

Yaşayannarın birisinä verildi gezmäk için elektrik tertipi. Hasta olduktan sora adam bir yıldan zeedä kendisi dışarı çıkmazmış. Şindi sä ilk keret oldu kolaylıı taa sokaa çıkmaa. O bütün ürektän şükür etti hepsini, kim ona yardımcı oldu. Onun yanında eşi, angısı söledi, ani şindi taa kolaylanacek da adam biraz taa serbest kendisini duyacek.

«Beendim, saa olun hepsiniz».

«Hep fayda, yatırkana sade, hiç kalkmȇȇr. Birbuçuk yıl oldu nicä yatalak. Ölä çıkarardılar ayda bir keret, açan geler uşaklar».

Medik tertiplerindän kaarä yardımı kabletti küüyün tertiplemäk izmetin çalışannarı da — onnara eni rubalar verildilär. Hel ölä da erindeki muzeya manikennarı getirdilär, ki taa kolay olsun Kultura zenginniklerini kullanmaa.

«Bendän da büük saa olsunnar, ani verdilär rubacıkları, giyelim da saalımız olsun».

Kazayak küüyün primarı Grigoriy Kior söledi,ani bölä yardım pek önemni hem faydalı.

«Rafet hem Ivanna Köksal «Moldova-Türkiya» dostluk dernään yardımınnan bizim dostlarımız verdilär bukadar önemni işleri bizim insan için — bastonnar, koläskalar,rubalar. Bu pek lääzımnı hem faydalı, pek sevindik, saa olsunnar hepsi»,- Grigoriy Kior söledi.

Kazayak küüyün aksalallar nasaatı başı Zahariy Momat urguladı,ani birliktä yapıldı büük iş.

«Saa olsun İvanna İv., ani getirdi medik inventarı bizim küüyä da yardım eder o insannara, ani büün yatalak, kalkamȇȇrlar, onnara yardım olȇr hem uşaklara»,- Zahariy Momat urguladı.

«İnsannara yardımnamak uurunda işlär hep ilerleerlär, listeya hep koyulêrlar kişilär, da savaşacez hepsinä yardım etmää, kimä bu gerçektän lääzım», — dedi Moldova Parlament eks-deputatı İvanna Köksal.

«Birkaç ay bän buluşmaları yaptım Türkiyedä , bizim kardaş primariyalarımız, Keçioren, Gölbaşı primariyası, Kalecki primariyası hem taa başka, dostlarımız — saa olsunnar — toplandılar da veräbildilär yardım. Biz bir parçasını — iki fura getirdik, ama taa toplanȇr orada — taa gelecek. Bilerim, ani devlet yardım eder, primariyalar savaşȇr yardım etmää, ama bizim da var «İnsannara yardım» organizaţiyası onun üstündän o yardımnarı getireriz da insannarımıza vereriz»,- dedi İvanna Köksal.

Medik hem reabilitaţiya tertipleri Gagauziyanın herbir küüyündä hem kasabasında yaşayannara verileceklär.