Kıpçak küüyündä iki infrastruktura proektleri artık kendi sonuna yaklaşêrlar. Primariya yapısının düzmek işleri yapıldılar, hep ölä da üzmäk için baseyn yakın zamanda başa çıkarılacek.
Ênergiyanın faydalı kullanması proektin sınırlarında Kıpçak küüyün primariya yapısında pençerelär diişildilär, sıcak sarıldı dışansı, örtü diiştirildi, koyuldular eni kurnalar hem dolay yanı tertiplendi, — söledi Kıpçak küüyün primarı Oleg Garizan: «Bıldır yılın bitkisindä biz başladık örtüyü diiştirmää primariyada hem duvarları remontlamaa. MIG-lan çalıştık bilä, ortaklıkta, birazını paraların bizä verdi MIG , birazını verdi Ispolkom(fond kontribuţiyalar için). Büünkü gündä var taa işimiz, düşüneriz, ani aşaada mramorlarlan işlemää, bu işleri,düşünerim, ani avalar doorulduynan, biz başaracez vakıdıncasına».
Hep ölä da bu vakıtta hep taa ilerlerlär üzmäk için baseynın düzülmesindä işlär hem üçkatlık yapı, sport okuluna deyni taa bir yapı. Ilk katta tenis olacek, ikincidä diişmäm için odalar hem sanitar erleri, üçüncüsü da yapılı sportlan zanaatlanmak icin, orada artık uşaklar thêkvandoya gezerlär.
«Ilki yıl geeri biz temeli attık, başladık temeli atmaa «Satul European-1″ programaya görä, bu bizim proektimiz Moldovada en büündän biri,12,5 million ley biz burayı harcadık. Bu para sadece donorlardan gelmedi, ama geldi regional bücetindän da bir payı. Şindi biz başarêêrız fasadı işlemää, ikinci katı başardık, ilk katı şindi başarêêrız — programa»DAR 3+1». Büünkü gündä 3 katta hazır. Şindi hazırlêêrı er , neredä bizim gençlär, büüklär, ihtiarlar, kim istärsaydı — fitness zal hazırlêêrız onnara, ani vakıt olduynan zanaatlansınnar fitnes-salada»,- söledi Kıpçak küüyün primarı Oleg Garizan.
Bu proektlerin giriştirilmesi doorudulu ki kurmaa taa ii koşulları erindeki administraţiya uzmannarı için hem yaşayannarĩn da olsun kolaylıı sportlan zanaatlanmaa hem saalıklı olmaa.