Çadırda geçti kultura avşamı — kasaba yaşayannarı siirettilär «Joc» Moldovanın anılmış kolektivini. Konţert geçti «Joc — arta cere ne uneşte» proektinä görä. Onu «Acces la cultura» Moldova Respublikasının Kultura ministerliin devlet programasının sınırlarında hazırladılar.
Çadır Kultura evin salası doluydu — atmosfera yortuluydu. Açtılar konţert programasını Kadınca gagauz ansambisi hem «Çudo-deti», angıları pay aldılar Joc ansamblisinin master-klasta. Açık renkli giimnär, muzika hem üüsek uurda horeografiya doldurdular bu avşamı türlü emoţialarlan. Siiredicilär saklamadılar kendi duygularını.
«Joc» oyun kolektivi bana deyni nicä bir düştü, hepsi onun için söläärdi, metedärdi, ama kendim görmediydim. Büün bän şaşkın kaldım, horeografiya ölä zor, aktiv, onnar türlü akrobatika elementlerini da yapêrlar, pek beendim».
«Pek islää, pek beendik bu kolektivi hem bütündän konţerti».
«Pek meraklıydı siiretmüü, seslemää, siirek göreriz, ama büün kararladık gelmää, pek beendik».
«Pek islää, hep giderim konţertlerä, hep onnarı siirederiz».
«Çoktan istäärdik görmää, Joc bizä kasabaya geldiydi bir keret, geçti 3-4 yıl, te şindi genä burada, biz pek kısmetliyiz, pek beendik».
Joc ansamblinin baş direktoru Marin Geras nışannadı, ani bölä olaylar birleştirerlär insannarı.
«Bu birleştirer, verer kolaylık taa yakın olmaa biri birimizä, üürenmää milletlerin kulturasını, angıları yaşêêrlar Moldovada. Biz pek sevineriz, ani bölä büük olaylarda biz sizin yanınızda Çadırda»,- Marin Geras nışannadı.
«Acces la cultura» programası açêr incäzanaat kapularını devletin hepsi yaşayannarına, insannarın var kolaylıı görmää bölä zenginnikleri, dedi Joc ansamblinin marketing direktoru Mariya Andriuţê: «Açan birleşerlär yaradıcılık kolektivleri, burada olêr çok türlü duygular, çok gözellik, incäzanaatın meraklıı hem hepsi ne var şaşılacek, siiredicilär nicä da hep Gagauziyada, sıcak, duygulu hem pek şen».
Çadır kasaba Kultura evin başı Janna Paşalı nışannadı, ani bölä olaylar gençlerä vererlär kolaylık görmää nekadar zengin devletin kulturası.
«Sţena uzmannarı, üüsek urda profesionallar kendi elini vererlär çekedän artistlerä — bu pek önemni. Bizim uşaklar hem «Kadınca» ansamblisi taa üüsek uurda olaceklar, onnar bunu gösterdilär master-klasta, elbetki bu verer stimul taa ileri gitmää, üüsek uura kalkmaa»,- Janna Paşalı nışannadı.
Herbir nomerı siiredicilär şen kaarşıladılar. Bitkidä üç kollektiv barabar oyunu gösterdilär — bu oldu halizdän incäzanaatın birleştirmesi.