Mart ayın birindä Komrat muniţipiyasının Kultura Evindä Martişora adalı konţert geçirildi. Bu ay Moldovada sevginin, enilenmesinin hem da tabiatın uyanmasının simvolu. Mȇrțișor — kırmızı-beyaz simvol —umudun hem aydın duyguların nışanı olarak kalêr.
Türkülär, oyunnar Komrat muniţipiyasının Kultura Evin zalını doldurdu. Mardın 1- dä Moldovada Mȇrțișor karşılanêr, bu oldu adet gibi, dedi Kültüra Evinin zanaat başı Denis Baburin: «Mardın 1-si Komrat Kultura Evindä geçti konţert, angısı Gagauziyada “Mȇrtișor” festivalinin büük kultura marafonun başlanmasını koydu. İlkyaz -güzellik, sevgi, tabiatın hem insan cannarının uyanması».
Mȇrtișor yortusu Moldovada geniştän kutlanılêr. Kurucular umut ederlär, ki bu konţert bütün ayına kultura olayların çalışmalarına bir büük ritm verecek. Programaya Kultura Evinin yaradıcılık kollektivleri katıldılar.
«Bizim kollektivlär çok çalıştılar, çoyu onnardan eni numaraları,türküleri,oyunnarı hazırladılar»,- dedi Denis Baburin.
Avşamın gözäl atmosferasını Komrat muniţipiyasının «Bürüncük» uşak teatru studiyasının aktörları kurdular. Sţenariyada onnar siiredicilerä «Mȇrtișor» legendalarını annattılar.
«Genç bir delikanlı uzaklara gitti. Kız her gün köprüyä gidip geçän insannara kırmızı-beyaz iplikleri baalayardı, sevgisini bekleyardi. İlkyaz günündä, kız kırmızı-beyaz simvolları paylaştırarkan, sevginsini gördü. Delikannı da ona mȇrtișor verdi. O gençlerin sevgisinin simvolu oldu».
Sonunda konţertin kurucuları Komrat kasabasının yaşayannarını hem musaafirlerini kultura evinä gelän yortulu olaylara teklif ettilär.
Denis Baburin: «Herkezini Kultura Evindä bekleeriz, bizim afişalarımızı hem soţial sayfalarımızı izleyin. İlkyaz –bu güzellik hem sevgi. Sevgi hem kultura biri birindän ayırılmȇȇr».
Mart ayında Komratta kultura evindä Mȇrtişor yortularına adalı konţertlar geçeceklär.