Büük ayın 21 — dä geçti GHT Prezidiumun oturuşu. Avtonomiyanın deputatları baktılar soruşu, angısı baalı Üüsek Dava Palatanın kararınnan 2026 — ci yılkın büük ayın 20 — dän. Ona danıştı kassaţion aalaşmasınnan Komratta Devlet kanţeläriyasının bürosu. Kendi danışmasında Devlet kanţeläriyası yazdı, ki GHT administrativ aktlarını, koymak için sayıya Gagauziya Merkez Seçim Komisiyasının azalarını geeri çevirmää. O üzerä, ani yok avtonomiyada legitim hem da zamandaş seçim bölümü, seçim proţesı yok nasıl geçsinnär, nışannanȇr bu bölümün saytında. Bakarak buna seçimnär GHT Baba Marta ayın 22 — dä geçmeyeceklär, haberledi GHT başın işini bir vakıda götürän Nikolay Ormanjı.
GHT başın işini bır vakıda götürän Nikolay Ormanji nışannadı, ani 2026 yılın büük ayın 20 — dä Üüsek Dava Palatası durguttu avtonomiyanın kanondakı bölümün iki kanonnarını №501 hem №502, angıları baalı Gagauziya Merkez Seçim Komissiyasının işinnän, angısına Moldova Seçim kodeksında Merkez seçim nasaatı deniler. Bu sebep için Baba Marta ayın 22 — dä GHT seçimnär geçmeyeceklär, GHT başın işini bir vakıda götürän Nikolay Ormanji haberledi: «Bu üzerä, biz büün prezidiumu hızlı toplandık saat 10:00. Oturuşta biz çok vakıt verdik buna, baktık, nasıl çıkmaa bu politika krizisindän, da kararladık geçirmää büük ayın 22 — dä GHT maasuz oturuşunu. Ama saat 11- dä biz diil ofiţial toplantıda bakacez peydahlanmış durumun çıkışını».
Seçim kampaniyası çekeder seçimnerä kalınca diil 60 gün, ama 90 gün, çizgiledi GHT başın işini bır vakıda götürän Nikolay Ormanji: «Ne için bän söleerim açıktan, ani Baba Marta ayın 22 — dä GHT seçimnär geçmeyeceklär? Neçinki büün seçim listeleri imzalanmarsaydılar, ama çekedärsäydilär yarından, ozaman GHT deputat görevinä kandidat verecek aalaşmayı, o üzerä, ani ondan bir gün alındı, neçinki bakarak seçimnär kanonuna imzalamak listeleri verilerlär seçimnerä 60 gün kalınca. Veriler bir ay sayıya koyulmak için hem da bir ay seçim kampanyasına. Ama yarınkı gündän kalacek 59 gün, öbür gündän sa 58. Bu söleer onu, ani Seçimnär kodeksinä karşı gidiler».
GHT başın işini bir vakıda götürän Nikolay Ormanji haberledi, ani zamandaşta GHT prezidiumu çalışȇr üristlärlän, durumun çözülmesi için . Getirecez aklılarınıza, ani yarın büük ayın 22 — dä saat 1- dä geçecek GHT maauz oturuşu.