Harman ayın 21-dä MD Parlamentin önündä GHT başı Valentin Gaydarjı pres-konferenţiyayı geçirdi. O çizgeledi GHT bakışını kanon için , angısı baalı diişmeklärlän Seçim kodeksindä.
Soruş seçim kanonda diişilmeklär için , angıları dolay seçimnerinnän baalı , bakılȇrlar Konstituţiya daavasında. Bu lääzım, ki düzmää kuralları MD kanonuna görä seçimnerin geçirilmesi için. GHT sayȇr , ki kanonun kararlanması için lääzım taa konsultaţiyalar geçsinnär. GHT başın Valentin Gaydarjının laflarına görä avtonomiyanın temsilcileri bu durumda umutlanȇrlar halklararası partörların dikkatlıına.
VALENTİN GAYDARJI GHT başı
«Siz hepsiniz bilersiniz , ani biz danıştık halklararası partnörlara , elçilerä, ministrulara Evropadan , Turkiye devletindän , Ukrainadan hem Amerikadan. Cuvap pek kaaviydi».
Valentin Gaydarjı andı Turkiye devletin parlament deputatın Kürşad Zorlu gelmesini Moldovaya. Buluşmanın süresindä devletin kuvetlerinnän laf gitti avtonomiyada seçimnerin geçirilmesi için da.
VALENTİN GAYDARJI GHT başı
«Siz gördünüz nicä canabin Kürşad Zorlu , Turkiye parlamentin deputatı hem AK partiyanın başın yardımcısı buluştular bizim prezidentlän, premyer — ministruylan, Parlament başınnan hem MD dış işleri ministrusunnan».
GHT başı çizgeledi , ki halklararası temsilcilär danıştılar ona düşünmeklärlän, angıları baalı durumnan Gagauziyada . Onnar sayȇrlar, ani bunu maasuz komisiyaylan parlamentin oturuşunda kararlamaa lääzım – söledi Valentin Gaydarjı .
VALENTİN GAYDARJI GHT başı
« Bizi pek düşünmeklerä yollandırȇr te o , ani bu diişilmeklär pek hızlı olȇrlar, bakarak ani onar pek önemni . Biz taa bir keret yaşayannara, mass-mediya uzmannara, hepsi dış partörlara çizgeleriz , ani ii kanon diil lääzım belä hızlı hızlıdan kararlansın. Onu lääzım hepsi uzmannar nicä devlettän, hep ölä Evropa tarafından da baksınnar , her biz gidärsäk Evropa integraţiyasına da».
Taa ileri GRT kanalına “Обсуждаем вместе” programasında MD parlamentin deputatı , açıkladı neçin bölä kararlar hızlı kablediler.
İGOR KİRİYAK MD parlamentin deputatı
«Bu proekt kanona görä kararlandı, parlamentin ilk oturuşunda , ki Gagauziyada dolay seçimneri geçirilsinnär. 9 aydan zeedä vakıt geçti, nicä GHT deputatların mandatları geçti da bu durum krizisä büün getirer, angısı şnänsora bitsin lääzım».
GHT teklif eder hükümeti bu soruşu oturuşun planından çıkarsın da geçirsin seçimneri onun geçirilmesi için. Bundan kaarä Valentin Gaydarjı açıklȇr , ani GHT kanon diişilmesi için köstek koymayaceklar.
VALENTİN GAYDARJI GHT başı
«Bizim bakışımız ölä, ani bu soruşu oturuşun planın listesindän çıkarmaa , deerindän onu açıklamaa da ozaman açan herbir tarafın bakışları esaba alınacek , sade ozaman kararlamaa. Tekrarlȇȇrız, ani biz annȇȇrız , ki devlet kanonu lääzım eniletmää hem annȇȇrız , ani Konstituţiya daavanın kararı var».
GHT neetli ötää dooru da avtonomiyanın yaşayannarını haberlemää kanonun kararlanması için.