Gücük ayın 14-dä nışannandı Gagauz halkının anılmış yazıcısının, bilimcisinin hem literaturacısının Gavril Gaydarcının anmak günü. O 28 yıl geeri aramızdan ayırıldı, ama büünnän büün onu anȇrlar hem aklılarında tutȇrlar Kırbaalı küüyün yaşayannarı, neredä G.A.Gaydarcı dünneyä gelmiş.
Gavril Gaydarcı anılmış lingvist, filologiya bilgileri doktoru, üüredici, aaraştırıcı, folklorcu, poet. MD bilimin Şannı izmetçisi, Gagauziyanın Şannı yaşayanı. Onun adınnan MD Bilim akademiyasında Gagauzovedeniye bölümün kurulması hem gagauz dilindä üürenmäk kiyatlarının hem metodika tekliflerinin hazırlanması baalı. Bulundu KDU gagauz filologiyası kafedranın kurulması temelindä. Kırbaalı küüyün primarı Tatyana Kiosä annadȇr, ani G.A.Gaydarcının düüma küüyündä gücük ayın 14-dä her yıl onu anȇrlar.
«Bizim yaşayannarımızın herbiri gurur onunnan, ani bölä küçük küüydä duudu bölä büük hem anılmış adam, nicä G.A.Gaydarcı. Onun adını bilerlär diil sade Gagauzi̇yada, ama bütün Moldovada»,- Tatyana Kiosä annadȇr.
2023-cü yılda Kırbaalı küüyü merkezindä G.A.Gaydarcının büstu koyuldu.
«Bu taa bir ii iş, ani bizim gençlerimiz unutmasınnar hem aklılarında tutsunnar bu anılmış adamı. Gururuz onunnan, ani bu anılmış adam bizim küüyümüzdä dünneyä gelmiş»,- Tatyana Kiosä annadȇr.
Gavril Gaydarcının katkısı gagauzların material olmayan vaarlıının toplaması hem koruması uurunda paasız, onun duuma küüyündä bu varlıı büük dikkatlıklan koruyȇrlar hem evladlara vererlär, nışannadı Kırbaalı küüyü kultura evi başı Evdokiya Dermenji: «Biz gururuz onunnan, ani o bizim küüyümüzdä dünneyä gelmiş hem unutmȇȇrız bunun için. Uşaklar gelerlär bibliotekaya da biz herzaman onun için burada annadȇrız».
Gavril Gaydarcı 30 yılı folklor materiallarını toplamış, ama tiparlamaa onnarı kendisi etiştirämemiş. 2018-cı yıldan beeri bu unikal araştırmaklar hem materiallar Gagauziya M.Maruneviç adına BAM “Gagauzologiya XIX-XX asirlerdä” seriyasınınnan basılȇr. G.A.Gaydarcının adını taşıyȇrlar gagauz küüyülerinin kimi sokakları hem Komrat liţeylerin birisi.