Komratta Gagauziya ilk çempionatı  hem Federaţiya kuboo estetika gimnaziyası uurunda geçti. Yarışmaklarda 290      sportçu  pay aldılar.

Esteti̇ka gi̇mnasti̇kası yarışmaklarında pay aldılar sportçular Kişinövdan, Benderdän, Komrattan hem Rıbniţadan. Bu sport çeşidi bulunȇr en gözäl hem zor sport çeşitlerin arasında, çünkü ona deyni hem kuvet hem elementlerin sinhron olması ön planda bulunȇrlar.  Gagauziyaya deyni bölä yarışmakların geçirilmesi istoriya olayı gibi sayılȇr, çünkü onda çok yıllık izmetin çıkışları gösterilerlär, nışannadı Gagauziya Gençlik hem sport bakan görevlisi Pavel Tulba.

PAVEL TULBA Gagauziya Gençlik hem sport bakan görevlisi

 «Bu fikir , geçirmää bu soy yarışmakları – bizdä çoktan vardı, taa 10 yıl geeri. Gagauziya Gençlik hem sport bakan görevlisi hertürlü savaşȇr tutturmaa bu sport bölümü , neçinki, o var nasıl demää bir bu soy sport bizim kızlara deyni, angısınnan bölä aktiv var nasıl zanaatlanmaa. Hep ölä, nicä çocuklara deyni futbol».

Çempionat halklararası istediklerä görä yapılan  sport kompleksindä geçirildi. Moldovada estetika gimnastikasının ilerlemesi için hem Gagauziyanın sportçularının onda pay alması için annatı  MD Estetika Gimnastikası Milli Federaţiyanın öndercisi Oksana Mihalçuk-Moraru.

OKSANA MİHALÇUK-MORARU MD Estetika Gimnastikası Milli Federaţiya öndercisi


 «Gagauziyada pek çok komanda ȇstetika gimnastikaylan zanaatlanȇrlar. Milli uurunda yarıșmaklar yıl-yıldan zeedelenerlär hem üüsek uurda çıkışları göstererlär.  Bir aftadan sora da Gagauziyanın komandaları  Evropa çempionatında pay alaceklar. Bilerim , ki pek ii bunu yapaceklar, neçinki gördüm onnarın beceriklerini milli uurunda. Büün da bizdä Gagauziyada ilk çempionatı bu sport uurunda geçer» .

AGG Alexia klubun baş treneri Kristina Sarı annattı takımın pay alannarın yarışmaklara katılmakları için. O nışannadı, ani sportçuların ilerlemesinä deyni bölä yarışmaklar pek önemni.

KRİSTİNA SARI AGG “Alexia” klubu baş treneri

« Bizim uşaklarımız seftä pay almȇȇrlar  bu soy olaylarda . Onnar nicä milli hep ölä halklararası yarışmaklarda da pay alȇrlar. Bu sport bölümü gösterer bizä en ii, gözäl uşakların becermeklerini. Bizim da milli yarışmaklarımız herzaman üüsek uurda geçerlär ».

Yarışmanın en küçük yaşlı sportçuları açıkladılar, ani bu yarışmaklar verdilär kolaylık korkuyu ensemää hem arenada becermekleri bütün kuvettän göstermää.                   

«Beni ana-boba tutturdu hem trener da bizdä pe ii».

«Bän biraz korkardım , ama sora şennendim, neçinki getirttim aklıma , ani çok yıl sınışları geçireriz , onuştan sınaştık».

«Bizi yarışmaların önündä yakındaklar okadar  sıcak tutturdular, ani biz pek islää büün gösterdik kendimizi».

Olayın kurucuları çizgileerlär, ani bu çempionat oldu taa bir er  gençlerin sport uurunda becermeklerini  hem eni bilgileri kabletmää kolaylıı. Sportçulara deyni sä, yarışmak becermeklerini kabletmesi hem eni yarışmaklara hazırlanmak kolaylıı.