Büün devlettä üüredicilerin günü bakılȇr. Yortu te onnarın, kim her gün uşaklara bilgi verer, yaşamak yolunu bulmaa hem üüretim proţesin zorluklarını çözmää yardım ederlär. Ama küçüündä dä büüyündä dä kendi ilk üüredicisi – insan, angısını yıllar boyunça hepbir akılında tutȇrlar.

Gagauziya yaşayannarı kendi ilk üüredicileri için akıla getirmeklerinnär paylaştılar. Kimä deyni ilk üüredici o sert, ama doruluk için üüredici. Kimä deyni cana yakın üüredici, angısı herzaman lääzımnı lafları bulan insan. Ama var te onnar da kimä deyni üüredici oldu örnek.

«Kendi ilk üüredicimi akılımda tutȇrım. Onun adı Praskovya Georgievna Kozarenko. O büün dä salıkta. Alla versin ona kaavi  saalık. Biz kimär sıra onu dolaşȇrız, okul zamanını akılımıza getireriz. Büük olarak küçüklüümüzä geeri dönmää çeker.Uşaklara dilerim üürensinnär. Herbir işin kendi vakıdı  var».

«Tutȇrım akılımda. Bendä diil sade bir üüredici. Bän çok sıra okul diiştirdim. Ama bilerim,ani hepsi akılında tutȇr te o üürediciyi, angısı acık üreklär terbi eder. Diil te onnarı,angıları kaavi  bilgi verer, ama te onnarı kim sevgiylän danışȇr».


«Grek Lüdmila Vladimirovna Avdarmadan ilk üüredicim. Pek islää insan. O verdi kaavi bilgi».


Büün Tamara Grigoryevna Şompol kendisi üüredici. Ona yardım etti kendi  zanaatını ayırmaa onun rumın dili üüredicisi. Ozaman Tamara Grigoryevna annadı, nekadar lääzımnı üüredici zanaatı.


TAMARA ŞOMPOL Kirsovo küüyü gimnaziyası rumın dili üüredicisi

«Halizdän örnek bana oldu benim üüredicim. O ekti benim canımda sevgi üüredicilää. Bän onun hatırınnan üüredici oldum. Vererim uşaklara kendi bilgilerimi, sevgimi, sıcaklıımı. Hem terbi ederim sevgi devlet dilinä».

Büün avtonomiya yaşayannarı üüredicileri kutlȇȇrlar hem saa ol deerlär,ani kaavi bilgi  vererlär, dayak olȇrlar.

« Saburluk hem ii üürenicileri dilerim».

« Alla versin saalık herbir üürediciyä, saburluk hem hepsi olsun islää onnarda». 

«Önemli o saalık, ko o olsun onnarda herzaman. Kaavi  sinir. Uzun ömür».

«Saygılı dostlar kutlȇȇrın sizi. Yortu kutlu olsun. Üüredicilär uşaklara bilgi vererlär hem terbiederlär. Onnarsız yaşamak taa da zor olacȇydı. Uslu üürenicileri dilerim, saalık hem yardım devlettän».

ÜNESKO teklif eder unutmama,ani  üüredicilerä investiţıya vereräk, düzülȇr kaavi bilgili geleceyemiz.