Gagauziya gimnaziyaların iş çıkışlarına nota koyuldu. En ii gimnaziyalar diplomnarı para premiyaları kablettilär üüretim uurunda üüsek çıkışları için, hem gagauz dili kullanmak sferasının genişletmesi için. Temayi Nat. Andrieş ilerleder.
İlk eri üüsek çıkışları için Gagauziya gimnaziyalar arasından kabletti Çadır kasabasının Pötr Kazmalı adına gimnaziyası. Altıncı yıl sıravardır kurum ilk eri aler bulunarak lider uurunda avtonomiya gimnaziyaların aralarında. Pötr Kazmalı adına gimnaziya bilim- proekt işindä da lider oldu, kolektivin profesional becereklik uuru 100 proţendä kaavilendi pedagogika kadraların atestaţiyasının süresindä. Gimnaziya başı Diana Räbaya nışannadı, ani bölä üüsek çıkışları kurum kazandı pedagogika kolektivin yardımınnan.
«Çok saa ol isteerim sölemää üüredicilerä, angıları Gagauziyada işleerlär neçinki bizim uşaklarımız gezerlär bir okuldan başka okula, bizä da gelerlär. Çok saa ol hepsi analara- bobalara, angılar bizä kendi uşakalrını vererlär. Çok saa ol üüretim bakannıına onnarın büük zor hem lääzımnı çalışması için.»
Taa bir kurum birinci eri kazandı — o Baurçu küüyün gimnaziyası. O oldu lider bilgilär kalitesindä hem bilim- proekt çalışmasında. Aktiv katılardı üüretim forumnara. Üüsek çıkışları gimnaziya kazandı gagauz dili oimpiadasında. Ayırı başarları- gimnaziya girdi Global Schools Prize 2026 dünnäarası premiyalar 50 finalist arasına. Bu yıl bu bir üüretim kurumu üüredicilär ilerlemesi kategoriyada oldu. Gimnaziya başı Galina Pamujak nışannadı, ani üüsek çıkışlar o büük hem zor iş angısını bütün kolektiv yaptı.
«Çok saa ol kolektivimä angısı bana deyni yakın en ii hem en sevinmeli. Bizim kolektiv için hem bana deyni bu pei ii çıkış. Olmaa reytingta hem ilk erä çıkmaa bu büük başırlar. Bölä uuraa etişmää yalnız yok nasıl bu komanda işi da bizdä o kuruldu.»
İkinci eri reytingta aldı Kongaz küüyün Nikolay Çebanov adına gimnaziyası. O regional olimpiadalarda hem bilim proekt çalışmasında lider. Taa bir ikinci eri aldı Kongazçık gimnaziyası. Üçüncü eri pay etti üç gimnaziya. Kongaz küüyün Varvara Topal adına gimnaziyası, Komrat kasabası Stepan Kuroglo adına gimnaziyası hem Gaydar küüyün Födor Angeli adına gimnaziyası. Dördüncü eri da pay etti iki gimnaziya Valkaneş kasabası Sergey Rudenko gimnaziyası hem Kotovskoe küüyün İlya Sınku adına gimnaziyası.