Regional resim galereyasında «Gagauz masalları:masaldan masala» kiyadın prezentaţiyası geçti. Toplumda kullanıldılar hem düzennendilär gagauzların folklor masallar yaratmaları.
«Gagauz masalları:masaldan masala» kiyadın hazırlayanı Akademik Todur Zanet. Masallar toplumu kiyadı tiparlandı Gagauziyanın «Gagauz dilinin kullanmak sferasının genişledilmesi için» kanonun ömürä geçirilmesi çerçevesindä.
Akademik Todur Zanet nışannadı: «Sora açan topladım kiyadı, gördüm ani masal çok-kiyat taşȇr. Taştırarsak hamuru ekmek eşiyecek. Onuştan onun üstündä yazdık birinci kiyat, bunun arkası da gelecek. Burayı biz hazırladık masalları hem Baboglunun masallarını alarkan annadık, ani lääzım gitmää taa derinä. Onuştan siz var nicä göräsiniz angı masalları aldık: Moşkovun, Baboglunun, Gagauz folkloru masallar Baboglunun hem iki dä T.Zanetin».
Gagauziya kultura bakanı Marina Semönova nışannadı, ani bu masal toplumun deerin hem önemni maanası var-terbietmää uşakları sevmää dilimizi hem masalları.
Marina Semönova, Gagauziya kultura bakanı, nışannadı: «Bizim büün var bir borcumuz evlad boyların önündä, bunnar az bişey ne biz yaptık, ama her yıl lääzım çıksın bölä masallar, bölä kiyatlar neçin deyni en üüsek bizim daavamız uşakları terbietmää ţ Büün bu kiyatları daadacez uışak başçalarına , okullara. Iildip başımı isteerim saaolsun demää herbir üürediciyä, ani üüredesiniz. Ko uışaklarımız äärensinnär, sevsinnär kendi Ana topraanı, dilini, istoriyasını, folklorunu hem herbir işi, angısını bizä braktılar analarımız hem dedelerimiz».
Kiyadın prezentaţiyasında Gagauziya uşak başçaları öndercileri hem terbiedicileri bulundular. Onnar masallar toplumun latin grafikasında tiparlanmasına üüsek nota verdilär.
Kiyatta raametli Dm.Savastinin resimneri kullanıldı. Toplumun içindeliinä girdi 29 masal.