Gagauziya M.Maruneviç adına BAM Gagauz halkının i̇stori̇yasında tanışma- temati̇ka lekţi̇yaları toplumu prezentaţiyası geçti. Onda pay aldılar BAM uzmannarı, bilim adamnarı hem üürenmäk kurumnarın temsilcileri.
Gagauz halkının i̇stori̇yasında tanışma- temati̇ka lekţi̇yaları toplumu birkaç avtorlan yapıldı. Onnarın arasında İvan Duminika, Viktor Ţvirkun, Vitaliy Boykov, Stepan Bulgar, Diana Nikoglo, Vitaliy Sırf, Svetlana Romanova, herkezi onnardan kendi uurunda üüsek uzman. Toplum iki dildä yapıldı gagauzça-rusça. Bu verer kolaylık taa büük sayıda insannara gagauz halkının kulturasınınnan, istoriyasınınnan tanışmaa, nışannadı Gagauziya M.Maruneviç adına BAM başı İrina Konstantinova: «Bu pek büük, önemni hem lääzımnı bir toplum, angısınınnan biz avtorlarlan barabar iki yıldan zeedä işledik. Toplumu yaparkana biz savaştık toplamaa o avtorları, angılarının araştırmalarında halkımızın istoriyası için önemni hem lääzımnı bilgilär var».
Gagauz halkının i̇stori̇yasında tanışma- temati̇ka lekţi̇yaları toplumu verecek kolaylık isteyennerä taa derindän gagauz halkının istoriyasına daalmaa hem onu üürenmää, nışannadı Gagauziya M.Maruneviç adına BAM bilim sekretari görevlisi Vitaliy Boykov: «Burada toplu temati̇ka lekţiyaları angılarını araştırıp açıkladılar gagauzovedeniye uurunda milli uzmannar. Onnar arasında gagauziya hem Moldova araştırıcıları. Biz seftä bir topluma onnarın araştırmalarını toplayıp, tiparladık».
İstoriya bilgileri uurunda doktor, habilitat, MD bolgaristlär kurumun öndercisi İvan Dumunika nışannadı, ani bitki yıllarda MD üürenmäk kurumnarında kulturabaalantıları üüretmäk kriteriyaları geliştirilerlär, alarak esaba bunu, toplum diil sade Gagauziyada, ama Moldovanın başka dolaylarında da kullanabilecek.
«2024-cü yılın kurikulumuna görä 25% başka kulturaların istoriyasınınnan hem kulturasınınnan baalantı olsun lääzım. Onuşan bulgar halkının, ukraina halkının, rus halkının, çıfıtlar halkının adetleri hem istoriyası üüredicileri kolay alabileceklär bu toplumdan bilgileri gagauz halkının istoriyası hem kulturası için»,- İvan Dumunika nışannadı.
Avtorların bakışına görä Gagauz halkının i̇stori̇yasında tanışma- temati̇ka lekţi̇yaları toplumu üürenmäk hem üüretmäk kaynaa gibi yakışȇr kullanılsın Universitetlerdä, koleclerdä hem liţeylerdä.