Gagauziya M.Maruneviç adına BAM gagauz dilini üürenmesi kurslarını başarannara sertifikatları ellerinä vermäk olayı geçti. 2025-ci yılda gagauz dili kurslarını türlü zanaatlarda hem yaşlarda insannar geçtilär. Hepsi onnar önemni bir neelän birleştilär- korumaa hem ilerletmää gagauz dilini hem kultura varlıını.
Gagauz dili kurslarını başarması sertifikatlarını 50 üürenicidän zeedä ellerinä aldılar. Bu yıl üüretim programası kapladı dört kvalifikaţiya uurunu — A1, A2, B1 hem B2, ne verdi kolaylık kursantlara geçmää alfabedin temelini üürenmesindän hem elementar frazalarından çetin gramatika kullanmasına hem ana dilindä zor dialogları kullanmasına kadar. Kurslar geçirildilär BAM işledilmiş üürenmäk kiyatlarına görä, angılarını dil üürenmesi halklaarası standartlarına görä yapıldılar, nışannadı Gagauziya M.Maruneviç adına BAM başı İrina Konstantinova: «Biz büün ölä bir iş yapȇrız, angısı gösterer , ani bizim Ana dilimiz –gagauz dilimiz yaşȇȇr! Ani o lääzım! Bana görä bu en önemni iş, açan isteer insan üürenmää kendi Ana dilini. Biz büün düşüneriz, ani dooru yoldayız hem Gagauziyamız önemni bir iş yapȇr, açan verer ölä ödemelär, ani parasız olsun kolaylık üürenmää Ana dilimizi».
Yortulu olayın süresindä kursları götürän filologlar nışannadılar, ani bakmayarak ona, ani kurslar avşamneen onlayn formatında geçirilärdilär, meräk hem havez üürenmää Ana dilini kursantlarda büüktü.
Elena Mihaylova, Gagauziya M.Maruneviç adına BAM gagauz dili kursları A1 uuru üüredicisi: «Sevindirer büünkü gündä, ani dilimiz başladı gözelleşmää . Bän küçükkenä dili üürendim malimdän, dädumdan . Çok şükür ederim onnarı kim benimnän birliktä bu işi yaptı, sevinerim, çok fodulum , kutlȇȇrım sizi».
Kursların A2 uurun üüredicisi İlya Karaseni nışannadı, ani bu kurslar diil sade dil üüretmesi uurunda iş, ama ona sevgiyi havezlendirmesi işi dä.
«A2 uurunu üüreneräk biz çalışȇrım, ani biz başlayalım duymaa Ana dilin gözelliini . O pek gçzäl bir dil . İncäzanaatı bulmaa Ana dilimizdä. Gagauzluk yaşasın hem gagauzların dünneyä bakışı taa kaavileşsin»,- İlya Karaseni nışannadı.
Kurslar diil sade teoriya, ama praktikaylan da sıkı baalıydılar, nışannadı B2 uurun üüredicisi Aleksandra Kristova: «Biz savaşardık bir urokta keksikayı da, sinonimneri, antonimneri nesoysa siirek karşılaşan sözleri savaşardık bulmaa, nesoysa tekstleri okumaa, savaşmaa çevirmää rusçadan gagauzçaya, gagauzçadan rusçaya hem pek çok işlär etiştirärdik kurslarda».
Gagauz dili uurunda kurslarını Gagauziya M.Maruneviç adına BAM büün dä ilerleder. Onnara katılmaa isteyennär BAM yakışȇrlar danışsınnar.