Gagauziya M. Maruneviç adına BAM-da geçti «Faydalı dostlar» kiyadın prezentaţiyası. Kiyatta toplu bilmeycelär hem dilkırmaklar, angılarının anması için boyamak resimneri dä verilerlär.
Kiyat ilerletmäk neetini götürer hem temsil eder rifmalı bilmeycelär hem dilkırmaklar toplumunu, angılara renkli hem şıralı gösterän gagauz koloritini resimnär hem eskizlär boyamak için verilerlär. Karar çıkarmaa bölä bir kiyat taa birkaç yıl geeri peydalandıydı, nışannadı proektin avtoru Aleksandra Kristova: «Biz kararladık bilmeyceleri, dilkırmaklarını koymaa kiyada, zerä pek önemni dilkırmakları kullanmaa uroklarda, neçinki onnar çözerlär uşaan dilini, uşaklarda söz engeli varsa, alȇrlar onu».
Kiyat tematikalı. Doorudulu uşak başçalarına, ilk okulda üürenän uşaklara hem “Zarzavatlar” temasına adalı. Baskıya girdi gagauz yazıcılarının bu temaya görä uşaklara deyni peetleri dä. Ama bunnardan kaarä elinä aldıynan kiyadı, onu kuran insannarın uşaklara hem Ana dilinä sevgisini dä duyȇrsın, nışannadı Gagauziya Üüretmäk bakannıın dillär ilerlemesi bölümün başı Mariya Uzun: «Duyulȇr sevgi gagauz dilinä, duyulȇr, ani bu yapılmış diil, ani lääzım deyni olsun, ama yapılmış bir neetlän –kolaylık olsun bizim üüredicilerä, çünkü büün kimi işidärsä, işit, deerlär, ani büüklär için var, ama küçüklär için yok. Üüredicilär çok vakıt harcȇȇrlar hazırlanmaa uroklara. Bu kiyatçık yardım edecek herkezinä».
«Faydalı dostlar» kiyadı olacek islää bir yardımcı material terbiedicilerä hem üüredicilerä gagauz dilini üüretimäk hem korumak proţesindä, nışannadı D.Çelengir adına liţeyin gagauz dili hem literatura üüredicisi Mariya Kapsamun: «Bizim Ana dilimiz büünkü gündä bulunȇr zor durumda, açan dil, var nasıl demää, yavaş-yavaş kaybeler er üzündän. Bu iş için sayȇrım, ani Aleksandra Afonasyevna, olarak bir ii talantlı üüredici, duydu hepsi bu engelleri da çalıştı ölä bir iş yaratmaa bu dünneyä, ani olsun yardımcı korumaa bizim Ana dilimizi».
Kiyat gagauz dili kurtarmak Fondun yardımınnan 1000 taanä sayısında tiparlandı hem Gagauziya uşak başçalarına hem okullarına daadılacek.